यो वर्ष मनसुनबाट १८ लाख नागरिक प्रभावित हुने आंकलन, ३० हजार बढी सुरक्षाकर्मी परिचालन गरिने

२१ जेठ, काठमाडौं । यो वर्षको मनसुनबाट करिब १८ लाख एक हजार नागरिक प्रभावित हुने आंकलन गरिएको छ । सोमबार बसेको विपद् जोखिम न्यूनीकरण तथा व्यवस्थापन कार्यकारी समितिको २३ औँ बैठकले मनसुनजन्य विपतबाट ८३ हजार घरपरिवार प्रत्यक्ष प्रभावित हुन सक्ने र १८ हजार घरपरिवारलाई उद्धार तथा राहत दिनुपर्ने आंकलन गरेको हो । 

बैठकले मनसुन पूर्वतयारी तथा प्रतिकार्य राष्ट्रिय कार्ययोजना, २०८१ पारित गरेको छ ।  मनसुनजन्य विपतबाट ८३ हजार घरपरिवार प्रत्यक्ष प्रभावित हुन सक्ने र १८ हजार घरपरिवारलाई उद्धार तथा राहत दिनुपर्ने आंकलनसहित पूर्व तयारीमा लाग्न गृहमन्त्री लामिछानेले आग्रह गरेका छन् । 

यस वर्षको मनसुन अवधिमा अघिल्लो वर्षको तुलनामा बढी प्रभाव पर्ने आँकलनका आधारमा सेना, सशस्त्र र नेपाल प्रहरीको जनशक्ति पनि ३१ हजारभन्दा बढी परिचालन गर्ने योजना छ ।

नेपाली सेना १० हजार ८४७, नेपाल प्रहरी १० हजार ५८५ र सशस्त्र प्रहरी बल ९९२४ जना परिचालन गर्ने योजना छ । यी बाहेक स्काउट लगायतका स्वयंसेवक पनि परिचालन गर्ने योजना । गत वर्ष १० हजार ५१८, नेपाल प्रहरी ११ हजार ६६१ र सशस्त्र प्रहरी बल ९ हजार ४९० जना परिचालित भएका थिए ।