वारणासीमा मोदी ७५ हजार र रायबरेलीमा राहुल १ लाख १६ हजार भोटले अगाडि

२२ जेठ, काठमाडौं । भारतमा आम निर्वाचनको मतगणना जारी रहँदा सरकार बनाउने दावी गरिरहेका नरेन्द्र मोदी र राहुल गान्धीले आफ्नो निर्वाचन क्षेत्रमा भारी मतले अग्रता बढाएका छन् । सात चरण लामो चुनावी प्रक्रिया सकिएर मंगलबार बिहानैदेखि लोकसभाका ५४२ सीटका लागि मतगणना भइरहेको छ । 

हालका प्रधानमन्त्री नरेन्द्र मोदीले वाराणसीबाट भारी अग्रता लिएका छन् । उनी कांग्रेस उम्मेदवार अजय रायभन्दा ७५ हजार भोट अगाडि छन् । यहाँको रायबरेली सीटमा कांग्रेसका राहुल गान्धी बीजेपीका दिनेश प्रताप सिंहभन्दा एक लाख १६ हजार भोटले अगाडि छन् ।

यस्तै अमेठीमा कांग्रेस उम्मेदवार किशोरीलाल बीजेपीकी स्मृति इरानीभन्दा ३७ हजार भोटले अगाडि छन् । सुलतानपुरमा सपाका राजभआल निषाद बीजपीका मेनका गान्धीभन्दा ९ हजार भोटले अग्रता लिइरहेका छन् ।

मैनपुरीबाट सपाका डिम्पल यादव बीजेपीका जयबीर सिंहभन्दा ५४ हजार भोट अगाडि छन् । गौतमबुद्ध नगरमा बीजेपीका महेश शर्मा सपाका महेन्द्र सिंह नागरभन्दा डेढ लाख भोटले अगाडि छन् ।