कोशी सरकार गठनविरुद्धको रिटमा आज निर्णय आउने सम्भfवना, श्रेष्ठ र ढकालको इजलासमा सुनुवाइ

२३ जेठ, विराटनगर । कोशी प्रदेश मुख्यमन्त्री केदार कार्कीले नयाँ सरकार गठन विरुद्ध दिएको रिटमा आज फैसला हुने सम्भावना देखिएको छ । यो रिट बुधबार सर्वोच्च अदालतका न्यायाधीशद्वय तिलप्रसाद श्रेष्ठ र बालकृष्ण ढकालको इजलासमा परेको छ । यो इजलासको तेस्रो नम्बरमा सुनुवाइ रहेकाले निर्णयमा पुग्ने सम्भावना देखिएको हो ।  

कार्कीले दायर गरेको रिटमा यसअघि १६ जेठमा  मनोजकुमार शर्मा र शारङ्गा सुवेदीको इजलासमा परेको थियो । तर, हेर्न नभ्याइनेमा परेकाले सुनुवाइ भएन । संविधानको धारा १६८ को उपधारा ५ अनुसार २७ असोज २०८० मा मुख्यमन्त्री बनेका कार्कीले अल्पमतमा परेको ३० दिनसम्म विश्वासको मत नलिएपछि २६ वैशाखमा प्रदेश प्रमुखले स्वतः पदमुक्त भएको घोषणा गर्दै सोही उपधारा अनुसार नयाँ सरकार गठन आह्वान गरेका थिए । 

सोही अनुसार २७ वैशाखमा प्रदेश प्रमुखले एमालेका हिक्मतकुमार कार्कीलाई मुख्यमन्त्री नियुक्त गरेका थिए । उपधारा ५ अनुसार नै मुख्यमन्त्री बनेका कार्कीलाई एमाले र माओवादी केन्द्रका ५२ सांसदको समर्थन छ । सरकार गठन विरुद्ध २७ वैशाखमा नै केदार कार्कीले सर्वोच्च अदालतमा रिट दायर गरेका थिए । सर्वोच्च अदालतले २८ वैशाखमा प्रतिवादीको जवाफ माग गरेको थियो । ९ जेठमा अदालतले मुख्यमन्त्री नियुक्तिको प्रक्रियाको कागजात झिकाउने आदेश गरेको थियो ।