आजै पदमुक्त हुने भएपछि मुख्यमन्त्री यादवले विश्वासको मत लिने तयारी

२३ जेठ, काठमाडौं । मधेशका मुख्यमन्त्री सरोजकुमार यादवले विरामी भएको भन्दै विश्वासको मत लिने कार्यसूची सार्न आग्रह गरेपनि सभामुखले कार्यसूची नहटाइ बुधबार नै विश्वासको मतका लागि बैठक बोलाएका छन् । विश्वासको मत नलिए यादव आजै राती १२ बजेपछि पदमुक्त हुँदैछन् ।  

आफू अस्वस्थ भएको भन्दै मुख्यमन्त्री यादवले २८ जेठमा विश्वासको मत लिन प्रदेशसभा सचिवालयमा पत्र पठाएका थिए । तर सभामुख रामचन्द्र मण्डलले बुधबार नै मुख्यमन्त्रीले विश्वासको मत लिने कार्यसूची बनिसकेको भन्दै त्यसलाई हटाउन अस्वीकार गरे ।

सभामुख मण्डलले संविधान अनुसार मुख्यमन्त्रीले विश्वासको मत लिने बुधबार नै अन्तिम दिन भएको बताए । मुख्यमन्त्रीको दल जसपा नेपाल विभाजन भएको ३० दिन भएको भन्दै उनले संवैधानिक जटिलता उत्पन्न हुन सक्ने भएकाले बुधबार नै मुख्यमन्त्रीलाई विश्वासको मत लिन भनिएको जिकिर गरे ।

बुधबार दिउँसो ४ बजे बसेको प्रदेशसभा बैठकको सुरुमै कांग्रेस सांसद वीरेन्द्र सिंहले बैठकमा मुख्यमन्त्री र मन्त्री उपस्थित नभएको भन्दै बैठक स्थगित गर्न माग गरे । त्यसपछि सभामुख मण्डलले १० मिनेटका लागि बैठक स्थगित गरेका छन् । मधेशका मुख्यमन्त्री सरोजकुमार यादवलाई नेपाली कांग्रेस र लोसपाले विश्वासको मत दिने भएका छन् ।

कांग्रेस संसदीय दलको बैठकले विश्वासको मत दिने निर्णय गरेको प्रमुख सचेतक कुमारकान्त झाले जानकारी दिए । यस्तै लोसपा संसदीय दलका उपनेता उपेन्द्र महतोले पनि मुख्यमन्त्रीलाई विश्वासको मत दिने निर्णय भएको बताए । 

मुख्यमन्त्री यादव आबद्ध रहेको जनता समाजवादी पार्टी नेपाल विभाजन भएको बुधबार राति १२ बजे ३० दिन पुग्दैछ । संविधानको धारा १८८ को २ मा मुख्यमन्त्री आबद्ध रहेको दल विभाजन भएमा त्यसको ३० दिनभित्र विश्वासको मत लिनुपर्ने हुन्छ ।