तीन दिनभित्र  १० प्रतिशत छात्रवृत्ति अनिवार्य दिन निजी विद्यालयहरूलाई महानगरको सर्कुलर

२४ जेठ, काठमाडौं । काठमाडौं महानगरपालिकाले निजी विद्यालयहरूलाई कक्षा १० सम्मका कक्षाहरूमा अनिवार्य रुपमा कम्तीमा १० प्रतिशत छात्रवृत्ति उपलब्ध गराउन निर्देशन दिएको छ ।  महानगरले ३ दिनभित्र सबै संस्थागत विद्यालयलाई छात्रवृत्ति विवरण पेस गर्न सूचना जारी गरेको हो । 

तोकिएको समयभित्र विवरण नबुझाएका यही वर्षदेखि स्कुल बन्द सूचीमा राख्ने चेतावनीसमेत दिएको छ । विवरण पेस नगर्ने विद्यालयहरूलाई शैक्षिक सत्र २०८१ मा सञ्चालन नरही बन्द विद्यालयको रुपमा अभिलेखिकरण गरिनेछ । यस्ता विद्यालयहरूमा विद्यार्थी भर्ना नगर्न/नराउनुहुन र गराएको भए अन्यत्र स्थानान्तरण गर्न समेत अभिभावकलाई सूचित गरिने व्यहोरी सूचनामा उल्लेख छ । 

महानगरको शिक्षा विभागले बिहीबार सूचना जारी गर्दै महानगरपालिका क्षेत्रमा सञ्चालित सबै संस्थागत विद्यालय (निजी स्कुल) ले कम्तीमा १० प्रतिशत छात्रवृत्ति रीतपूर्वक वितरण गर्नुपर्ने जनाएको छ । यो व्यवस्था कार्यान्वयन गराउन पटकपटक अनुरोध गर्दा जेठ २३ गतेसम्ममा महानगर क्षेत्रका ४७३ संस्थागत विद्यालयले छात्रवृत्तिको विवरण उपलब्ध गराएका महानगरपालिकाले जनाएको छ । 

त्यसरी विवरण उपलब्ध गराउने विद्यालयहरूको विवरण पनि महानगरले सार्वजनिक गरेको छ । छात्रवृत्ति विवरण पेस हुन बाँकी रहेका विद्यालयहरूले काठमाडौँ महानगरपालिका शिक्षा विभागमा तीन दिनभित्र माग भएको छात्रवृत्ति विवरण उपलब्ध गराउनु पर्नेछ,’ महानगरले जारी गरेको सूचनामा भनिएको छ, अन्यथा त्यस्ता विद्यालयहरूलाई शैक्षिक सत्र २०८१ मा सञ्चालनमा नरही बन्द विद्यालयको रुपमा अभिलेखिकरण गरी त्यस्ता विद्यालयहरूमा विद्यार्थी भर्ना नगर्न÷नगराउन र गराएको भए अन्यत्र स्थानान्तरण गर्न समेत अभिभावकलाई सूचित गरिने छ ।