दक्षिणकालीमा मृत भेटिएका पुरुष र युवतीको शव सनाखत

२४ जेठ, काठमाडौं । काठमाडौं । दक्षिणकालीमा मोटरसाइकल दुर्घटनामा परी मृत फेला परेका महिला र पुरुषको शव सनाखत भएको छ । बुधबार साँझ दक्षिणकाली नगरपालिका–८ केराबारीस्थित भिरमा मोटरसाइकल दुर्घटनामा मृत्यु भएको अवस्थामा एक युवती र एक युवकको शव फेला परेको थियो । 

प्रहरी परिसर काठमाडौँका प्रवक्ता एसपी नवराज अधिकारीका अनुसार मृत भेटिएका पुरुष शव धादिङको सिद्धलेक गाउँपालिका– ५ घर भई हाल भक्तपुर बस्दै आएका ४२ वर्षीय रामचन्द्र खनालको भएको र युवती चाँगुनारायण नगरपालिका– ५ भक्तपुरकी ३२ वर्षीया सविना राई भएको खुलेको हो ।  

बुधबार दिउँसो दक्षिणकाली नगरपालिका– ८ केराबारी भन्ने ठाउँको अप्ठ्यारो भिरमा कालो जिन्सको पाइन्ट र खैरो टिसर्ट लगाएको युवक तथा कालो जिन्स पाइन्ट, आकासे रंगको टिसर्ट लगाएको तथा रातो लेडिज ब्याग बोकेको अवस्थामा युवतीको शव फेला परेको थियो । 

स्थानीयको सूचनापछि इलाका प्रहरी कार्यालय फर्पिङ, प्रहरी बृत्त कीर्तिपुर तथा विपद् व्यवस्थापन कार्यालय सामाखुसीबाट गएको प्रहरी टोलीले सडकबाट दुई सय मिटर तल भिरमा अड्किएको अवस्थामा शव निकालेको थियो ।