अर्थमन्त्री पुनद्वारा धितोपत्र बोर्डको वार्षिकोत्सव बहिष्कार, प्रमुख अतिथि नै नआएपछि कार्यक्रममा तनाव

२५ जेठ, काठमाडौं । अर्थमन्त्री वर्षमान पुनले नेपाल धितो पत्र बोर्डको कार्यक्रम बहिष्कार गरेका छन् । बोर्डको ३२ औं वार्षिकोत्सवको कार्यक्रममा उनी नगएका हुन् । अर्थमन्त्री पुनलाई कार्यक्रममा प्रमुख अतिथिका रुपमा आमन्त्रण गरिएको थियो । 

शुक्रबार जारी वार्षिकोत्सव कार्यक्रममा उनी अनुपस्थित भएपछि आयोजकहरू असमञ्जसमा परेका छन् । उनीसँगै नेपाल राष्ट्र बैंकका गभर्नर पनि नआएकाले कार्यक्रम सञ्चालन गर्न समस्या भएको आयोजक धितो पत्र बोर्डका कर्मचारीले बताएका छन् । कार्यक्रममा उपस्थित नभएपछि बोर्डका कर्मचारीले अर्थमन्त्रीले कार्यक्रम बहिष्कार गरेको भएपनि कुनै खबर नआएको बताए ।

लामो समयदेखि सरकारले बोर्डमा अध्यक्ष नियुक्ति गर्न सकेको छैन । अध्यक्ष नियुक्तिमा एमाले अध्यक्ष ओली र अर्थमन्त्रीबीच हानथाप छ । पुस तेस्रो सातादेखि रिक्त रहेको अध्यक्ष नियुक्त गर्ने कार्य अन्तिम चरणमा पुगे पनि विवाद आउने भएपछि मन्त्री पुनले अध्यक्ष नियुक्त प्रकृया रोकेका छन् । यो समाचार तयार पार्दासम्म पुन कार्यक्रममा पुगेका छैनन् ।