असार २ भित्र निर्णय सच्याउन मेयर बालेनलाई कबाड व्यवसायीको चेतावनी

२७ जेठ, काठमाडौं । काठमाडौं उपत्यकाको रिङरोडभित्र रहेका सबै कबाड हटाउने निर्णय असार २ गतेभित्र फिर्ता लिन कबाड व्यवसायीले काठमाडौं महानगरपालिकाका मेयर बालेन शाहलाई चेतावनी दिएका छन् । संघर्ष समितिले रिङरोडभित्रका कबाड हटाउने काठमाडौं महानगरका मेयर बालेनले नसच्याए यसविरुद्ध सशक्त संघर्षमा उत्रने उनीहरुको चेतावनी छ । 

आइतबार काठमाडौंमा पत्रकार सम्मेलन गर्दै संघर्ष समितिले महानगरका मेयरको ज्यादतीपूर्ण निर्णयविरुद्ध आगामी असार २ गतेदेखि सशक्त संघर्षमा उत्रिन लागेको जानकारी दिएको छ । आन्दोलन सुरु हुनुभन्दा अगाडी यो निर्णय सच्याउन महानगरसँग उनीहरुके माग छ । कबाड व्यवसायी संघर्ष समितिका संयोजक रामकेवल गुप्ताले आफूहरूको व्यवसायलाई विस्थापित गर्ने उद्देश्यले रिङरोडभित्रका कबाड हटाउन लागिएको भन्दै यो निर्णय सच्याउनुपर्ने बताए । 

उनले काठमाडौं महानगरका मेयर बालेनले नगर प्रहरी लगाएर जबरजस्त शैलीमा आफ्नो व्यवसाय हटाउने काम गरेको आरोप लगाए । आफूहरूको समस्याबारे प्रधानमन्त्रीसहित सबै निकायमा जानकारी गराए पनि कुनै सुनुवाइ नभएको उनको गुनासो छ । उच्च अदालतले कबाड व्यवसायीलाई नहटाउन आदेश दिँदा पनि महानगरले कबाड व्यवसायीको टहरामा डोजर चलाएको उनको आरोप छ ।