पैठारी शुल्क तिर्न निगम सहमत भएपछि नेपाल आउन थाले सीमामा रोकिएका ग्यास बुलेट

२९ जेठ, काठमाडौं । नेपाल आयल निगमले नेपाल तर्फको पैठारी शुल्क जिम्मा लिने सहमति गरेपछि तीन दिनदेखि नेपाल–भारतको सीमामा रोकिएका ग्यास भरिएका बुलेट नेपाल भित्रन थालेका छन् । ग्यास बोकेर आएका भारतीय नम्बर प्लेटका बुलेट नेपाल आउँदा लाग्ने अस्थायी पैठारी शुल्कमा विवाद उठेपछि रोकिएका थिए । आयल निगमले व्यहोर्ने सहमति जनाएपछि भन्सार नाकाबाट बुलेट जाँचपास हुन थालेको बताइएको छ । 

आगामी आर्थिक वर्षको बजेटमार्फत नेपाल भित्रिने भारतीय नम्बर प्लेटको ग्यास बोकेको बुलेटमा अस्थायी पैठारी शुल्क निर्धारण गरेपछि विभिन्न सीमामा दुई सय पचासभन्दा धेरै बुलेट तीन दिन यता थन्किएका थिए । सरकारले आर्थिक अध्यादेशमार्फत अस्थायी पैठारी हुने सवारी तथा ढुवानी साधनमा एकमुष्ट शुल्क लगाउने व्यवस्था गरेको छ ।

जसअनुसार एलपी ग्यास ढुवानी गरी ल्याउने बुलेट ट्रकलाई गन्तव्यस्थलमा अनलोड गर्नका लागि वस्तु जाँचपास भएको ९६ घण्टासम्मको लागि १ हजार ५ सय रुपैयाँ, एलपी ग्यास बुलेटबाहेक अन्य बस्तु ढुवानी गरी ल्याइएको ट्रक, ट्रेलर, ट्रयाक्टर र अन्य ढुवानीको साधनहरुको हकमा ७२ घण्टासम्मको अवधिको लागि १ हजार ५ सय तोकेको छ ।