सहसचिव पाण्डेलाई बरण्डाको कुर्सी, प्रचण्डले पेन्डुलम बनाएका सापकोटा बर्षमानको रोजाईमा

३० जेठ, काठमाडौं । एकपछि अर्को विवादित काम गर्दै आएका अर्थमन्त्री वर्षमान पुनले बिना कारण सहसचिव टोकराज पाण्डेलाई जगेडामा पठाएका छन् । अर्थ मन्त्रालयको प्रशासन महाशाखा प्रमुखको जिम्मेवारी रहेका पाण्डेलाई हटाएर अहिले नारायणप्रसाद सापकोटालाई ल्याइएको छ । गत चैत १२ मा मात्र अर्थ मन्त्रालय भित्रिएका सहसचिव सापकोटाले प्रशासन प्रमुखको जिम्मेवारी पाएका हुन् । अर्थ मन्त्रालयको प्रशासन महाशाखा प्रमुखको जिम्मेवारीमा रहेका सहसचिव पाण्डेलाई भने जगेडामा पुर्याइएको छ । 

आफैले एयरपोर्ट भन्सार कार्यालयको प्रमुखबाट अर्थ मन्त्रालय सरुवा मागेका पाण्डे स्वच्छ छविका कर्मचारी मानिन्छन् । तत्कालीन अर्थमन्त्री प्रकाशशरण महतका पालामा अर्थ मन्त्रालयको प्रशासन महाशाखा प्रमुख बनेका थिए । वर्षमान पुन अर्थमन्त्री भएपछि अर्थ भित्रिएका सहसचिव सापकोटाले डा. पाण्डेलाई विस्थापित गरेर प्रशासन महाशाखामा स्थापित भएका हुन् ।

झन्डै एक वर्षदेखि प्रधानमन्त्री प्रचण्डले ‘पेण्डुलम’ बनाएर राखेका वरिष्ठ सहसचिव सापकोटाले बल्लतल्ल जिम्मेवारी पाएका छन् ।  प्रधानमन्त्री प्रचण्डले चार महिना मै गत वर्ष १२ असारमा राजश्व अनुसन्धान विभागको महानिर्देशकबाट अकस्मात् हटाएर प्रधानमन्त्री तथा मन्त्रिपरिषद्को कार्यालयमा तानिएका भएका सहसचिव सापकोटा त्यसयता जिम्मेवारीविहीन अवस्थामा थिए ।

प्रचण्डका पीए नवराज ढुंगानाले सापकोटालाई विस्थापित गरेर राजश्व अनुसन्धान विभागको महानिर्देशक बनेपछि उनी प्रधानमन्त्री तथा मन्त्रिपरिषद् कार्यालयमा तानिएका थिए । ९ महिनासम्म उनी प्रधानमन्त्री कार्यालयको बरण्डामा बस्न बाध्य भए । सापकोटाले पाण्डेलाई विस्थापित गरेपछि बरन्डामा बस्ने पालो पाण्डेको आएको चर्चा अर्थ मन्त्रालयका कर्मचारीहरूले गरेका छन् ।