खुलामञ्च अतिक्रमण प्रकरणमा मेयर-उपमेयर आमनेसामने

काठमाडौं । काठमाडौं महानगरपालिकाका मेयर विद्यासुन्दर शाक्यले खुल्लामञ्चमा अतिक्रमण गरेर व्यवसायिक सटरहरु भत्काइने बताएका छन् ।

शुक्रबार महानगरमा सरोकारवाला स्थानीयहरुको ध्यानाकर्षण पत्र बुझ्दै शाक्यले अनुगमनको रिपोर्ट आउने बितिकै व्यवसायिक सटरहरु भत्काइने बताएका हुन् ।

उनले खुलामञ्च बिक्री प्रकरणबारे उपमेयरलाई अनुगमन गरेर रिपोर्ट दिन निर्देशन दिएको भन्दै अहिलेसम्म रिपोर्ट नै प्राप्त नभएको बताए । आफ्नै महानगरकी उपमेयर हरिप्रभा खड्कीलाई चिठ्ठी नै पठाएर रिपोर्ट बुझाउन आग्रह गरिएको उनले बताए ।

शाक्यले उपमेयर खड्कीले कांग्रेसको कार्यकर्ता बनेर खुलामञ्च प्रकरणमा राजनीतिक गरेको आरोप पनि लगाए । त्यस्तै उनले आफुलाई धम्काउने गरेको पनि गुनासो गरे । खुलामञ्चमा बसपार्क राख्न दिएको सम्झौताभन्दा विपरित गएर नयाँ संरचना बनाइएको जानकारी पाए लगतै यसबारे आफुले चासो दिएको उनको दाबी छ ।

सो क्रममा भीमसेनदास प्रधानले खुलामञ्च बिक्री प्रकरणमा संलग्न जो कोहीलाई कारवाही हुनुपर्ने बताएका छन् । उनले खुलामञ्च अतिक्रमण रोक्न निरन्तर दवाव दिईने पनि बताएका हुन् ।

काठमाडौंको सबैभन्दा ठूलो खुला क्षेत्रमा रहेको खुलामञ्च हाल बसपार्कको रुपमा संचालन हुँदै आईरहेको छ । नियम, मापदण्ड र सहमति विपरित ४० वटा नयाँ सटर निर्माण गरी बिभिन्न क्रियाकलापहरु भएपछि स्थानियहरु आन्दोलनमा उत्रेका हुन् । निर्माण भएका सटरहरु डोजर लगाएर नहटाएसम्म आन्दोलन जारी राख्ने चेतावनी समेत उनीहरुले दिएका छन् ।