पहिलो पटक दक्षिण अफ्रिकासँग भिड्न लागेको नेपाल 'गर या मर'को अवस्थामा !

३२ जेठ, काठमाडौं। आईसीसी टी–२० विश्वकपमा शनिबार नेपालले दक्षिण अफ्रिकासँग खेल्दै छ । खेल किङ्सटाउनस्थित आर्नोस भेल स्टेडियममा नेपाली समय अनुसार, बिहान ०५ः१५ बजे सुरु हुनेछ ।  नेपाल र दक्षिण अफ्रिकासहित समूह ‘डी’ मा बङ्गलादेश, नेदरल्यान्ड्स र श्रीलङ्का पनि रहेका छन् । यो खेलमा नेपाल ‘गर या मर’ को स्थितिमा छ ।

प्रतियोगिताको ‘सुपर–८’ चरणमा पुग्ने सम्भावना जीवित राख्न यो खेलमा नेपालले दक्षिण अफ्रिकासँग जित्नै पर्नेछ । नेपालका लागि दक्षिण अफ्रिका बलियो प्रतिद्वन्द्वी हो । अन्तर्राष्ट्रिय क्रिकेट काउन्सिलद्वारा घोषित पछिल्लो टी–२० अन्तर्राष्ट्रिय वरीयतामा दक्षिण अफ्रिका सातौँ स्थानमा छ । नेपाल भने वरीयताको १७ औँ स्थानमा छ ।  

समूह ‘डी’ मा नेपाल बाहेक अन्य टोलीले तीन–तीन खेल खेलिसकेका छन् । नेपालले भने आफ्नो तेस्रो खेल खेल्न लागेको हो । तीन खेलबाट ६ अङ्क बटुल्दै दक्षिण अफ्रिका पहिलो र समान खेलबाट चार अङ्क जोड्दै बङ्गलादेश दोस्रो स्थानमा छन् । 

यसैगरी तीन खेलबाट दुई अङ्क बटुलेको नेदरल्यान्ड्स तालिकाको तेस्रो स्थानमा छ । दुई खेलबाट एक अङ्क जोडेको नेपाल चौथो स्थानमा छ । तीन खेलबाट एक अङ्क जोडेको श्रीलङ्का पाँचौँ स्थानमा छ । श्रीलङ्का भने उपाधि होडबाट बाहिरिइसकेको छ ।

दक्षिण अफ्रिका यसअघि नै प्रतियोगिताको ‘सुपर–८’ चरणमा पुगिसकेको छ । नेपालले भने सुपर–८ मा पुग्ने सम्भावना जीवित राख्न बाँकी दुवै खेल जित्नैपर्ने हुन्छ । नेपालले अन्तिम खेल बङ्गलादेशसँग खेल्नेछ ।