रौतहटमा शौच गर्न निस्किएका युवक मृत फेला

१ असार, रौतहट । रौतहटको सदरमुकाम गौर नगरक्षेत्र अन्तर्गत केराबारीमा अपरान्ह एक जना युवकको शव भेटिएको छ । गौर–४ टिकुलिया बकैया खोलाको बाँध नजिकै स्थानीय शुभ नारायण सहनीको छोरा २० वर्षीय युवक रोहित सहनीको शव भेटिएको हो ।

घरबाट शौच गर्न निस्किएका उनको शव घर नजिकैको केराबारीमा फेला परेको रौतहटका प्रहरी नायव उपरीक्षक (डीएसपी) एलिजा गिरीले बताइन् ।  मृतक सहनीको शरीरमा कुनै प्रकारको दाग तथा कुटपिटको चिन्ह नदेखिएको उनले बताइन् । मृतकको खल्तीबाट लागूऔषध गाँजा भरिएको चिलम जस्तो सामाग्री बरामद भएको छ ।

गाँजाको नशामा गर्मीको कारण बेहोस भएर पानीको कमीको कारण पनि मृत्यु हुनसक्ने अनुमान गरिएको छ । मृतकको नाकबाट रगत समेत बगेको पाइएको छ । मृतक शहनिको शव पोस्टमार्टमका लागि प्रादेशिक अस्पताल गौरमा पठाइएको छ । सहनीको कसैले हत्या गरेको हो वा होइन अनुसन्धान तथा पोस्टमार्टम रिपोर्ट आएपछि मात्र खुल्ने डीएसपी गिरीले बताइन् ।