कछुवा गतिमा काम गरिरहेको सहकारी छानबिन समितिले आज कार्यविधि पास गर्ने

२ असार, काठमाडौं । गठन भएको २० दिन पुग्न लाग्दा पनि सहकारी छानबिन विशेष समितिले आफ्नो कामलाई अगाडि बढाउन सकेको छैन । गत जेठ १५ गते समिति बनेको थियो । त्यसयता समितिको कार्यादेश पुरा गर्न कसरी काम गर्ने भन्ने छलफल पनि भएको छैन । 

यसअघि बसेको बैठकले समितिको सचिवालयलाई कार्यविधि बनाउने जिम्मा दिएको थियो । त्यो कार्यविधि पारित गर्न भन्दै आइतबार समितिको बैठक बोलाइएको छ । सहकारीको बचत रकम हिनामिना र अपचलनका सम्बन्धमा गठित संसदीय छानबिन विशेष समितिको बैठक नयाँ बानेश्वरस्थित संसद् भवनमा दिउँसो १ बजे  बस्ने समितिका सदस्य बद्री पाण्डेले नेपालबहसलाई जानकारी दिए । 
 
उनका अनुसार आजको बैठकमा समितिको कार्यविधिमाथि छलफल गरेर पास गर्ने तयारी छ । पाण्डेले समितिले कार्यविधि पास गरेपछि आफ्नो काम विस्तृत रूपमा अगाडि बढाउने बताए । एमालेका नेता सुर्य थापा संयोजक रहेको समितिका सदस्यहरूमा नेपाली कांग्रेसका ईश्वरी न्यौपाने र बद्री पाण्डे, एमालेकी सरिता भुसाल, नेकपा माओवादीका लेखनाथ दाहाल, राष्ट्रिय स्वतन्त्र पार्टीका शिशिर खनाल र राष्ट्रिय प्रजातन्त्र पार्टीका ध्रुवबहादुर प्रधान छन् । 

सहकारी ठगी प्रकरणमा उपप्रधान तथा गृहमन्त्री नै संलग्न भएको भन्दै नेपाली कांग्रेसले छानबिन समितिको माग गरेपछि गत जेठ १५ गते समिति गठन भएको थियो । ३ महिनाको समय दिइए पनि समितिले यतिको समय त्यसै गुजारेको छ ।