ललितपुरको श्रमजित माविमा खेताला शिक्षक राखेर तलव खाने पौडेलविरुद्ध शिक्षामा उजुरी

३ असार, काठमाडौं । ललितपुरकाे श्रमजित किशोर मावि लुखुशीमा मावि तृतीय श्रेणीका विज्ञान शिक्षक राजेन्द्रराज पौडेलले खेताला शिक्षक राखेर आफूले अवैध रुपमा तलब लिएको भन्दै अर्का शिक्षकले शिक्षा मन्त्रालयमा उजुरी पठाएका छन् । अशोक यादवलाई खेताला शिक्षक राखेर बर्षौदेखि पौडेलले तलब भने आफूले खाँदै आएको पाइएको छ । 

पौडेलविरुद्ध श्रमजित किशोर मावि लुखुशी ललितपुरका एक  निवर्तमान शिक्षकले शिक्षा मन्त्री सुमना श्रेष्ठलाई हुलाकमार्फत उजुरी पत्र पठाएको बताएका छन् । उनले मन्त्री श्रेष्ठलाई पत्रसँगै श्रमजित किशोर माविका तृतीय श्रेणीका विज्ञान शिक्षक पौडेलले खेताला शिक्षक राखेको र पौडेलले विद्यालयको अध्यापन तालिकामा समेत पठाएको बताएका छन् । उनले शिक्षामन्त्री  श्रेष्ठलाई हुलाकमार्फत पठाएको पत्रमा सो माविका विज्ञान शिक्षक पौडेलले खेताला शिक्षक राखी बर्षौदेखि नियम विपरीत कार्य गर्दै आएकोले उनलाई नियम बमोजिम कारबाही गर्न माग गरेका छन ।

विज्ञान शिक्षक पौडेलको  विद्यालयको अध्यापन तालिकामा  नामसमेत नभएकोले प्रमाण स्वरूप सो रूटिन पनि पेस गरेको बताएका छन । उजुरीकर्ता निवर्तमान शिक्षकका अनुसार निज पौडेल एक विद्यालयको प्रधानाध्यापक हुँदा भ्रष्टाचारको आरोपमा कारवाही परेपछि श्रमजित मावि ललितपुरमा सरुवा भएका थिए ।

उनलाई ललितपुर उपमहानगरपालिकाका शिक्षा महाशाखा  प्रमुख महेन्द्रबहादुर क्षेत्रीको संरक्षण रहेको छ । खेताला शिक्षक राखेर तलब खाने शिक्षक पौडेल  ललितपुर उपमहानगरपालिकाका शिक्षा महाशाखा प्रमुख महेन्द्रबहादुर क्षेत्रीको विश्वासिला पात्र हुन् । महाशाखा  प्रमुख महेन्द्रबहादुर क्षेत्रीले पौडेलमार्फत नै शिक्षक सरुवा र नियुक्तिमा अनियमित तवरले रकम उठाउने गरेका छन ।  

यस विषयमा विगतमा शिक्षा मन्त्रालयलगायत विभिन्न निकायमा उजुरी पर्दासमेत महाशाखा प्रमुख महेन्द्रबहादुर क्षेत्रीले शिक्षक पौडेललाई बचाउँदै आएका छन ।  त्यसैले शिक्षा मन्त्री श्रेष्ठलाई हुलाकमार्फत  पत्र पठाउनु परेको उनले बताए । यस विषयमा ललितपुर उपमहानगरपालिकाका शिक्षा महाशाखा  प्रमुख महेन्द्रबहादुर क्षेत्रीसँग भने सम्पर्क हुन सकेन ।