म प्रहरी चलाउने पक्षमा छैन, आईजी फेरिन्नः प्रधानमन्त्री

३ असार, चितवन । प्रधानमन्त्री पुष्पकमल दाहाल प्रचण्डले प्रहरी संगठनभित्र सरकारी हस्तक्षेपबारे प्रष्टीकरण दिएका छन् । उनले प्रहरी संगठनमा नियमित प्रक्रियाबाहेक अरु कुनै पनि पदमा फेरबदल  नहुने बताएका छन् । सोमबार भरतपुर विमानस्थलमा पत्रकारहरूसँग उनले प्रधानमन्त्रीले प्रहरी संगठनभित्र हस्तक्षेप गर्यो, आफ्ना मान्छे भित्र्याउन लाग्यो भन्ने कुरा गलत भएको बताए । 
 
सुशासन, न्याय र सामाजिक समृद्धिको क्षेत्रमा थुप्रै सकारात्मक काम गर्ने प्रयासमा रहेको भन्दै उनले  प्रहरी नेतृत्वको काम सन्तोषजनक रहेको बताए । प्रहरी महानिरीक्षकको परिवर्तनका सन्दर्भमा कुनै परिवर्तन नहुने बताए । उनले भने, मैले अस्तिको दिन मात्रै आईजीपीहरूलाई बोलाएर केही परिवर्तन हुँदैन तपाईंहरू ढुक्कसँग काम गर्नुस् भनिसकेको छु । त्यही गतिमा उहाँहरूले काम गर्नुभएको छ । यो हल्ला मात्रै हो, प्रहरीको आईजीपी फेरिन्न ।’