६ किलो सुन र ४८ लाख नगदसहित पक्राउ परेका चिनियाँसँग भेटियो नेपाली नागरिकता

३ असार, काठमाडौं । काठमाडौंको कपनबाट ६ किलो सुन र ४८ लाख नगदसहित पक्राउ परेका चिनियाँ नागरिकलाई प्रहरीले सार्वजनिक गरेको छ । उनीसँग नेपाली नागरिकता रहेको पाइएको छ । सीआईबीका प्रवक्ता होबिन्द्र बोगटीका अनुसार चिनियाँ मूलका जस्ता देखिने ती व्यक्तिको साथबाट सोनाम गुरुङ नामको एउटा नागरिकता पनि फेला परेको छ । 

पक्राउ पर्ने ३७ वर्षीय उनको नेपाली नागरिकतामा शेरब ग्याल्मो नाम छ । उनका साथबाट ६ किलो सुन र ४८ लाख नेपाली रुपैयाँ बरामद गरिएको थियो । सिआइबीले ६० किलो सुन तस्करी प्रकरणमा अनुसन्धान गर्ने क्रममा अवैध सुन खरिद बिक्री बापत सुनको भुक्तानी क्रिप्टोकरेन्सी (युएसडिटी) बाट दिने मानिसहरूको खोजी गरिरहेको अवस्थामा उनी पक्राउ परेका हुन् । 

सोही क्रममा सिआइबीले काठमाडौं महानगरपालिका वडा नम्बर ६ बौद्ध तीनचुलीमा डेरा गरी बस्ने शेरब ग्याल्मो भनिने सोनाम गुरूङलाई पक्राउ गरेको हो । उनले आफू चिनियाँ नागरिक रहेको भनेर प्रहरीलाई बताएका छन् । उनको कोठामा तलासी लिँदा प्रहरीले ६ किलो सुन र ४८ लाख नगद फेला पारेको थियो । बरामद भएको सुनको आधिकारिक तौल र परीक्षण गर्न बाँकी रहेको सिआइबीले जनाएको छ ।