राजदूत भागबण्डामा प्रधानमन्त्री खिन्न

७ असार, काठमाडौं । सत्ता सहयात्री दल नेकपा एमाले र रास्वपाले नाम दिए भने ११ देशका लागि शुक्रबार राजदूतहरु नियुक्तिका लागि सिफारिस गर्ने तयारीमा सरकार छ । तर, प्रधानमन्त्री पुष्पकमल दाहाल प्रचण्ड भने स्वयं यो भागवण्डाबाट सन्तुष्ट देखिएका छैनन् । बिहीबार साँझ राजदूत भागबन्डा गर्दा माओवादीले एक जना मात्र पायो ।  

माओवादीका एक नेताले भने, जो प्रधानमन्त्री छ, उसले एक जना मात्र राजदूत पाउने कुराले राजनीतिमा राम्रो सन्देश जाँदैन, यसले प्रधानमन्त्रीको मोरल डाउन गरेको छ । सत्ता सहयात्री दलले पनि सोच्नुपर्ने कुरा हो । देशको प्रधानमन्त्रीलाई ट्र्यापमा पार्ने काम भयो । उता, एमालेले भने माओवादीबाट राजदूत भएकाहरू यथावत रहेकाले एक जना पनि सम्मानका लागि दिएको बताएका छन् । मन्त्री बनाउँदा भएको सहमति अनुसार हो भने एमालेले १० जना राजदूत पाउनुपर्ने हो ।   
 
यसअघि १० सांसद बराबर एक मन्त्रीमा प्रधानमन्त्री प्रचण्डले एमाले अध्यक्ष ओलीसँग सहमति गरेका थिए । तर, विस्तारै  प्रचण्ड प्रधानमन्त्री भएपनि सरकारमा उनको बोलवाला चल्दैन भन्ने कुरा प्रष्ट हुँदै आएको छ । प्रधानमन्त्री आफैले पनि ओलीसँग काम गर्न असहज भइरहेको कुरा पार्टीमा सुनाउँदै आएका छन् । बजेटमा मन्त्रीले नै आफूलाई नटेरेको कुरा उनी स्वयंले संसदमा बताएका थिए । सत्ता सहयात्री दलका नेता केपी ओलीले प्रधानमन्त्री प्रचण्डलाई कति मान्यता दिएका छन भन्ने कुरा बिहीबारको प्रतिनिधिसभामा पनि देखियो । 

संसद भवनभित्र भएर पनि ओली प्रधानमन्त्रीले सम्बोधन गर्दा हलमा देखा परेनन् । उनी संसदमै थिए । सहयात्री दलका नेताले आफूलाई अपमान गरेको कुरा प्रधानमन्त्री प्रचण्डले रोष्टमबाटै ओकलेका थिए । । राजदूतमा मात्र हैन प्रधानमन्त्रीले मन्त्रिपरिषदमा पनि आफ्नो निर्णय गर्न पाएका छैनन् । उनी एक साताअघि नै मन्त्रिपरिषद पुनर्गठन गर्न चाहन्थे तर, पाएनन् । कारण हुन ओली । एक मन्त्रीका अनुसार मन्त्री परिषदमा जाने विषय र गरिनुपर्ने निर्णयमा पनि प्रधानमन्त्रीसँग पावर छैन । 

मन्त्रिपरिषद बैठक बस्नु अघि एमाले अध्यक्ष ओली सिंहदरबार वा बालुवाटार जहाँ भएपनि पुग्छन् । ओली पुगेर प्रधानमन्त्रीसँग विषयका बारे कुरा नगरेसम्म नियमित बैठकसमेत बस्दैन । ओलीबाट पास गराएपछि मात्र ति विषय मन्त्रिपरिषदमा एजेण्डाका रुपमा जान्छन् । आज पनि अपरान्ह चार बजे मन्त्रिपरिषद् बैठक बोलाइएको छ । ओलीले नाम दिए भने राजदूत सिफारिसको निर्णय हुन्छ ।

प्रधानमन्त्री तथा मन्त्रिपरिषद्को कार्यालय सिंहदरबारमा बस्ने मन्त्रिपरिषद्को बैठक सामान्यतया साताको सोमबार र बिहीबार बस्दै आएको थियो । यो साता सोमबार नबसेको बैठक आज बस्न लागेको उनले बताए । आजको बैठकले रिक्त ११ देशका राजदूत नियुक्तिका लागि सिफारिस गर्ने तयारी छ । बिहीबार बेलुका प्रधानमन्त्री प्रचण्डसहित एमाले अध्यक्ष केपी शर्मा ओली र उपप्रधानमन्त्री समेत रहेका रास्वपाका सभापति रवि लामिछानेले राजदूत भागबन्डा टुङ्ग्याएका थिए । 
 
जसअनुसार एमालेले ८, रास्वपाले २ र माओवादीले एक राजदूत पाउने सहमति छ । अघिल्लो मन्त्रिपरिषद् बैठकले भारत, अमेरिका, बेलायत, साउदी अरेबिया, दक्षिण कोरिया, मलेसिया, स्पेन, डेनमार्क, इजरायल, कतार र पोर्चुगल गरी ११ देशको राजदूत फिर्ता बोलाएपछि ती स्थानमा राजदूत नियुक्तिका लागि सिफारिस गर्न लागेको हो ।