अदालत छल्न हतारमा पारित गरियो कोशीको बजेट

८ असार, विराटनगर । विपक्षी र सत्तापक्षका बहुसंख्यक सांसदले खुला रूपमा विरोध गरेको कोशी प्रदेशको बजेट शनिबार पारित भएको छ  । शुक्रबार राति नौ बजेसम्म विनियोजन विधेयकमाथि छलफल गरेर शनिबार पारित गरिएको हो । यो बजेटप्रति प्राय सांसद सन्तुष्ट थिएनन् । 

चार दिनको छलफलपछि शनिबार बसेको प्रदेशसभाको बैठकले आर्थिक वर्ष २०८१–८२ को बजेट पारित गरेको हो । विनियोजन विधेयक २०८१ र अर्थसम्बन्धी प्रस्तावलाई कार्यान्वयन गर्न बनेको विधेयक २०८१ बहुमतले पारित भयो । १ असारमा अर्थमन्त्री रामबहादुर मगरले ३५ अर्ब २७ करोड ९३ लाख रुपैयाँको बजेट प्रस्तुत गरेका थिए । ४ असारबाट प्रदेशसभा बैठकमा बजेटमाथि छलफल सुरु भएको थियो । 

कोशी सरकार गठनविरुद्धको मुद्दा सर्वाेच्च अदालतमा परेको रिटमा आइतबारबाट निरन्तर सुनुवाइ हुँदैछ । त्यसैले शनिबार नै हतारमा बजेट पारित गरिएको हो । गत वर्ष सत्ता परिवर्तनको खेलले गर्दा केही समय बजेट शून्यताको अवस्था आएको थियो ।

नेकपा एमाले, नेकपा माओवादी केन्द्र, नेकपा एकीकृत समाजवादी लगायतका सत्ता गठबन्धन  दलका बहुसंख्यक सांसदहरूले आर्थिक वर्ष २०८१–८२ को बजेट असन्तुलित, विभेदकारी र प्राथमिकता भुलेर ल्याइएको भन्दै असन्तुष्टि जाहेर गरेका थिए ।