लालीगुराँस संरक्षण अभियानमा नेता कोइराला

९ असार, काठमाडौं ।  नेपाली कांग्रेसका नेता डा. शेखर कोइराला लालीगुराँस संरक्षण अभियानमा जोडिएका छन् । धरानको विकट क्षेत्र मानिने बङ्सिलामा आइतबार लालीगुराँस रोपेर नेता कोइरालाले संरक्षण अभियान सुरु गरेका हुन् । 

नेपाली कांग्रेस सुनसरी क्षेत्र नम्बर १ ले धरान वार्ड नं–२० मा पर्ने बिष्णुपादुकाको बङ्सिलामा बृक्षारोपण कार्यक्रम राखेको भएपनि पहिरोले सडक अवरुद्ध गरेपछि नेता कोइरालाले निर्धारित स्थान भन्दा ३ किमीको दुरीमा लालीगुराँसको बिरुवा रोपेका थिए ।

सो अवसरमा उनले गुराँसको राजधानी तिनजुरे मिल्के जलजलेमा समेत लालीगुराँस मासिँदै गएकोमा चिन्ता व्यक्त गरे । यस क्षेत्रको विकासको निम्ति लालीगुराँस अत्यन्तै महत्त्वपूर्ण रहेको र पर्यटन प्रवर्द्धनमा कोशेढुँगाको रुपमा स्थापित हुने धारणा राखे । धरानको विकट क्षेत्रमा पनि विकासको लागि यस्ता रचनात्मक कदमको जरुरी रहेको र लालीगुराँस संरक्षण अभियानमा निरन्तर लाग्नुपर्ने बताए ।