कर्मचारी आन्दोलनतिर गएपछि सुरुहुन सकेन संसद बैठक, कार्यसूची प्रभावित

१० असार, काठमाडौं । विभिन्न माग राखेर संसद् सचिवालयका कर्मचारीहरू आन्दोलनतिर लागेपछि सोमबारको प्रतिनिधिसभा बैठक सुरु हुन सकेको छैन् । अतिरिक्त भत्ता लगायतका सेवा सुविधा बृद्धिको माग गर्दै कर्मचारी आन्दोलनतिर हिँडेपछि प्रतिनिधिसभाको बैठक प्रभावित भएको हो । 

प्रतिनिधिसभाको सोमबारको बैठक ११ बजे बोलाइएको थियो । तर, अहिलेसम्म सुरु हुन सकेको छैन । संसद्का कर्मचारी र प्राविधिक कर्मचारीले आन्दोलन गरेपछि बैठक सुरु हुन नसकेको संसद् सचिवालयका प्रवक्ता एकराम गिरीले जानकारी दिएका छन् । सोमबारको बैठकमा मन्त्रीहरूले आआफ्ना मन्त्रालयगत विनियोजनमाथि सांसदहरूले उठाएका प्रश्नको जवाफ दिने कार्यसूची थियो । 

कर्मचारीका माग सम्बोधन गर्नका लागि कानुन, न्याय तथा संसदीय मामिलामन्त्री पदम गिरीलगायत छलफलमा रहेको पनि प्रवक्ता गिरीले जानकारी दिए । मन्त्री गिरी, संसद् सचिवालयका महासचिव पद्मप्रसाद पाण्डेय र कर्मचारी युनियनका अध्यक्षलगायत वार्तामा रहेकाले संसद् बैठक बस्न ढिलाइ भएको हो ।