भीआईपी सवार बुद्ध एयरमा रुवाबासी, काठमाडौं फिर्ता गरिएको जहाज फेरी भैरहवा मै अवतरण

१२ असार, काठमाडौं । नेकपा एमालेका उपाध्यक्ष विष्णु पौडेलसहित योजना आयोगको टोली सवार बुद्ध एयरको यू४–८५१ उडान नम्बरको जहाज प्रतिकूल मौसमका कारण भैरहवामा अवतरण गर्न नसकेर काठमाडौं फर्किएको छ । जहाज बस्न नसक्ने भनेपछि जहाजभित्र यात्रुको रूवाबासी चलेको थियो । 

बुद्ध एयरका सूचना अधिकारी दीपेन्द्र कर्णले प्रतिकूल मौसमका कारण जहाज डाइभर्ट गर्नुपरेको र उक्त उडानलाई मध्याह्न १२ बजे पुनः भैरहवा अवतरण गराइएको जानकारी दिए । प्रतिकूल मौसमका कारण यती एयरलाइन्सको जहाज समेत भैरहवामा अवतरण हुन नसकेपछि काठमाडौं फिर्ता भएको थियो ।

जहाज भैरहवास्थित गौतम बुद्ध विमानस्थल अवतरण गर्न नसकी काठमाडौं फिर्ता गर्दा जहाजभित्र रूवाबासी चलेको योजना आयोग उपाध्यक्षको सचिवालयले जनाएको छ । आयोग टोली बुटवलस्थित बुटवल धागो कारखाना, धौवाधी फलाम उद्योग लगायत अनुगमनमा बुटवल जाँदै थियो ।

यो टोलीको आगामी शुक्रबार मात्र काठमाडौं फर्किने योजना थियो । जहाज बिहान करिब ८ बजे भैरहवा पुगे पनि विमानस्थलमा अवतरण हुन नसकी काठमाडौं नै फिर्ता भएको हो । पछि फेरी भैरहवा नै लगेर अवतरण गरिएको बुद्ध एयरले जनाएको छ ।