एसईईको रिजल्ट हेर्न मिल्ने १० वटा वेबसाइट खुल्नै गाह्रो

१३ असार, काठमाडौं । परीक्षाफल प्रकाशित भएदेखि एसईईको रिजल्ट हेर्न भनेर सार्वजनिक गरिएका १० वटा वेबसाइटमा समस्या देखिएको छ । कुनै पनि वेबसाइट सहज रुपमा खुलेका छैनन् । परीक्षा नियन्त्रण कार्यालयले एसईई नतिजा हेर्नका लागि विभिन्न माध्यमको व्यवस्था गरिएको जानकारी दिए पनि वेबसाइट  भने खुल्न गाह्रो छ । 

नेपाल टेलिकमले पनि आईभीआर, एसएमएस वा वेबसाइटको माध्यमबाट एसईईको नतिजा थाहा पाउन सकिने जनाएको छ । त्यो पनि खुल्दैन । टेलिकमको मोबाइल फोन या ल्यान्डलाइनबाट १६०० मा डायल गर्दा प्राप्त हुने निर्देशानुसारको प्रक्रियाबाट नतिजा प्राप्त गर्न सकिने टेलिकमले जनाएको छ । तर, जवाफ केही  आउँदैन ।

मोबाइल फोनबाट १६०० मा सिम्बोल नम्बरसहित एसएमएस पठाएर पनि नतिजा थाहा पाइने भनिएको छ । टेलिकमको वेबसाइटबाट मार्कसिटसहितको नतिजा प्राप्त गर्न सकिने भने पनि हेर्न कठिन भइरहेको विद्यार्थीहरूले गुनासो गरेका छन् । 

बोर्डका अनुसार आइभीआरका लागि नेपाल टेलिकमको ल्यान्डलाइन फोन, मोबाइलबाट १६०० डायल प्राप्त निर्देशनअनुसार गर्नुपर्ने छ । एसएमएसको लागि मोबाइलको म्यासेज बक्समा EE<space> <symbol number> टाइप गरी १६०० मा पठाउनुपर्ने छ । वेबसाइटको लागि Website: http://see.ntc.net.np मार्फत हेर्न सकिने छ ।

त्यसैगरी निजी क्षेत्रको दूर सञ्चार प्रदायक संस्था एनसेलको एपमार्फत पनि एसईईको नतिजा हेर्न सकिने जनाएको छ । एनसेल एपको होम स्क्रिनमा गई एसईई रिजल्टमा ट्याप गरेर परीक्षार्थीको सिम्बोल नम्बर र जन्म मिति सबमिट गरेर नतिजा हेर्ने सकिनेछ । बोर्डले आजै बिहान एसईईका नतिजा प्रकाशन गरेको हो ।