एसईईको मौका परीक्षा साउन १८ र १९ गते, बोर्ड बैठक अघि नतिजा आएको बारे छानबिन हुने

१३ असार, काठमाडौं । एसईईमा फेल भएका २ लाख ४२ हजार ३१४ जना विद्यार्थीले साउन १८ र १९ गते मौका परीक्षा दिन पाउने भएका छन् । माध्यमिक शिक्षा परीक्षा बोर्डले (एसईई) को ग्रेड वृद्धि परीक्षा साउन १८ र १९ गते हुने बताएको छ । आज सार्वजनिक भएको नतिजा अनुसार दुई लाख ४२ हजारभन्दा धेरै विद्यार्थीको एनजी (नन ग्रेडेड) आएको छ । 

जसमा दुई विषयमा एनजी आएका विद्यार्थीहरूले साउन १८ गते र १९ गते हुने परीक्षामार्फत ग्रेड वृद्धि परीक्षा दिन पाउने राष्ट्रिय परीक्षा बोर्डका अध्यक्ष डाक्टर महाश्रम शर्माले जानकारी दिए । ४८ हजार ३८ विद्यार्थीको एक विषयमा एनजी आएको छ भने ६७ हजार ८०० विद्यार्थी दुई विषयमा एनजी आएको छ । 

बोर्डका अनुसार उत्तीर्ण हुने विद्यार्थीमध्ये १.६० बाट दुईसम्म जीपीए ल्याउने ६ जना रहेका छन् । यस्तै जीपीए २ देखि २.४० ल्याउने २९५० जना, जीपी २.४० देखि २.८० ल्याउने ४१ हजार ४७७ जना, जीपीए २०.८० देखि ३.२० ल्याउने ७८ हजार ८७४ र जीपीए ३.२० देखि ३.६० ल्याउने ६८ हजार २५६ जना र ३.६० बाट ४ सम्म ल्याउने ३१ हजार २०९ जना  विद्यार्थी रहेका छन् ।
 
परीक्षामा नियमित तर्फ ४ लाख ६४ हजार ७८५ जना परीक्षार्थी सहभागी थिए । परीक्षा बोर्डले (एसईई) २०८० को नतिजा औपचारिक रूपमा सार्वजनिक नगर्दै समाचार माध्यममा सार्वजनिक भएकोबारे छानबिन गर्ने भएको छ ।

बोर्डले नतिजा सार्वजनिक गर्दा बिहीबार बिहान पौने ११ बजेको थियो भने सवा नौ बजे नै नतिजाको मूल आशय र अंक सार्वजनिक भइसकेको बारेमा सञ्चारकर्मीले सोधेको प्रश्नमा बोर्ड अध्यक्ष डा.महाश्रम शर्माले आन्तरिक छानबिन गरिने बताए ।