नेता व्यवस्थापन गर्न नेकपा एसले पदाधिकारीसहित थप्यो वरिष्ठ उपाध्यक्ष पद, केन्द्रीय सदस्य २९९

१३ असार, काठमाडौं । महाधिवेशनको तयारीमा जुटेको एकीकृत समाजवादीले पदाधिकारी र वरिष्ठ उपाध्यक्ष पद थप्ने निर्णय गरेको छ । बिहीबार बसेको बैठकले महाधिवेशनको हलबाट अनुमोदन गर्ने गरी पदाधिकारी र केन्द्रीय कमिटीको आकार बढाएको हो ।

केन्द्रीय परिषदले १९९ सदस्यीय केन्द्रीय कमिटी र १९ सदस्यीय पदाधिकारी रहने विधान पास गरेको थियो । तर अब केन्द्रीय कमिटी २९९ सदस्यीय बनाउने निर्णय भएको उपमहासचिव एवं प्रचार विभाग प्रमुख जगन्नाथ खतिवडाले बताए । सचिवालय बैठकले २१ सदस्यीय पदाधिकारी र २९९ सदस्यीय केन्द्रीय सदस्य रहने व्यवस्था गर्ने निर्णय गरेको हो । 

यसअघि १९९ सदस्यीय केन्द्रीय समिति बनाउने निर्णय भएको थियो । पार्टीमा अहिले रहेको सम्मानित नेताको पद पनि कायमै राख्ने सहमति भएको छ भने वरिष्ठ उपाध्यक्ष पद सिर्जना गरिनेछ । केन्द्रीय उपाध्यक्षमा महिला सिट सुरक्षित रहने व्यवस्था गरिएको छ । पार्टीमा एक अध्यक्ष र एक महासचिव रहने व्यवस्था छ । आवश्यकताअनुसार वरिष्ठ नेताको पद सिर्जना गरिनेछ । 

यता, सम्मानित नेता झलनाथ खनालले पार्टीको भावी नेतृत्वमा आफ्नो नाममा सहमति हुने दाबी गरेका छन् । सचिवालय बैठकबाट बाहिरिने क्रममा आफ्नो नाममा सहमति हुन नपर्ने कुनै कारण नभएको बताएका छन् । अध्यक्षबाट ब्याक भएर घनश्याम भुसाललाई सघाउने हिजोको भेटमा सहमति भएको हो ? भन्ने सञ्चारकर्मीको जिज्ञासामा उनले आफ्नो दावी कायमै रहेको बताए ।