रौतहटमा बिजुली काटेर स्कार्पियो गाडी चोरी

१४ असार, रौतहट । रौतहटको दुर्गा भगवती गाउँपालिका वडा नं.–३ मत्सरीमा स्कोर्पियो गाडी चोरी भएको छ । घर अगाडि पार्किङ गरी राखेको बागमती प्र ०१ ०२६ च ५८६४ नम्बरको स्कोर्पियो गाडी चोरी भएको हो । स्थानीय राजन झाको घर अगाडि राखिएको सो गाडी मंगलबार अबेर राती अन्दाजी १ देखि ३ बजेको समयमा  चोरी भएको थियो। 

राजेश कुमार झाको नाममा रहेको सो गाडी चोरी हुनु भन्दा पहिला गाउँभरीको विद्युत लाइन काटेर बाटोमा रहेको सिसी टीभी बन्द हुने बित्तिकै गाडी चोरी भएकाले चोरीमा गाउँको मान्छेको पनि संलग्नता हुन सक्ने गाडी धनीले दाबी गरेका छन ।  

प्रहरीमा उजुरी दिए पनि गाडी चोरी भएको ३ दिन बितिसक्दा पनि अहिले सम्म प्रहरीबाट कुनै किसिमको सूचना नआएको गाडी धनीको गुनासो रहेको छ । जिल्ला प्रहरी कार्यालय रौतहटले चोरीको घटना बारे अनुसन्धान भइरहेको जनाएको छ ।