भ्रातृ संस्थाको तदर्थ समिति भंग गर्न देउवाले बुढानीलकण्ठमा बोलाए पदाधिकारी बैठक

१६ असार, काठमाडौं । पार्टीको आगामी रणनीति र भातृ संस्थाबारे निर्णय लिनुपर्ने भन्दै नेपाली कांग्रेसका सभापति शेरबहादुर देउवाले पदाधिकारी र पूर्वपदाधिकारीको बैठक बोलाएका छन् । सोमबार दिउँसो ३ बजे बूढानीलकण्ठस्थित निवासमा पदाधिकारी तथा पूर्वपदाधिकारीको बैठक बोलाएको कांग्रेस मुख्यसचिव कृष्णप्रसाद पौडेलले जानकारी दिए ।

बैठकमा १५ असारबाट समयावधि सकिएका भातृ संस्था, गठन हुन नसकेका विभाग, केन्द्रीय समिति बैठकको मिति र समसामयिक विषयमा छलफल हुने बताइएको छ । पार्टीले सबै भ्रातृ संस्थाको अधिवेशन गर्न १५ असारसम्मको अवधि दिएको छ । यो अवधिभित्र मुस्लिम संघ र लोकतन्त्रवादी आदिवासी जनजाति महासंघले मात्रै अधिवेशन गरेको छ । 

कांग्रेसका ११ वटा भ्रातृ संस्थाको तदर्थ समितिमै सीमित रहेको छ । उनीहरुको लामो समयदेखि निर्वाचन भएको छैन । बैठकमा निर्वाचन गराउने समय दिने वा कार्यसमिति भंग गर्ने भन्ने निर्णय हुनेछ । अहिलेका कार्यसमिति भंग गरेर नयाँ कार्यसमिति बनाई निर्वाचन गराउने जिम्मा दिनुपर्ने माग पार्टीभित्र उठिरहेको छ । भोलि प्राय भातृ संस्थाको तदर्थ समिति भंग हुने बताइएको छ ।