प्रदेशमा प्रत्यक्ष राखेर समानुपातिक निर्वाचन प्रणाली हटाइने

१८ असार, काठमाडौं  । संविधान संशोधनमार्फत प्रदेशबाट समानुपातिक निर्वाचन प्रणाली हटाइने भएको छ । गएराति नेपाली कांग्रेस र नेकपा एमालेबीच भएको सहमति अनुसार प्रदेशबाट समानुपातिक सांसद नराख्ने र प्रत्यक्ष निर्वाचित सांसद मात्रै राख्ने समझदारी बनेको छ । 

दुई दलबीच भएको सहमति आज मंगलबार सार्वजनिक गरिँदैछ । कांग्रेस सभापति शेरबहादुर देउवा र नेकपा एमालेका अध्यक्ष केपी शर्मा ओलीले संयुक्त रुपमा हस्ताक्षर गरेपछि सहमति सार्वजनिक गिरिने बताइएको छ ।

नेताहरूका अनुसार दुई दलको सरकार बनेपछि निर्वाचन प्रणालीमा सुधार गर्ने लगायतका विषयमा संविधान संशोधन गर्ने सहमति पनि भएको छ । संविधान संशोधनबाट प्रदेशमा भएको समानुपातिक निर्वाचन प्रणाली हटाइने सहमति भएको हो ।  

राजनीतिक स्थायित्वका लागि संविधानमा आवश्यक संशोधन गर्ने र तदअनुरूपका कानुन समेत निर्माण गर्ने गरी भएको सहमतिमा सुरुमा केपी ओलीको नेतृत्वमा बन्ने सरकारलाई राष्ट्रिय सहमतिको सरकार बनाउन प्रयास गरिने छ ।