समझदारी अनुमोदन गर्दै कांग्रेस, नेपालसँगको भेटबारे देउवाको ब्रिफिङ

१९ असार, काठमाडौं । नेपाली कांग्रेसको कार्यसम्पादन समितिको बैठक बसिरहेको छ । बैठकले नेकपा एमालेसँग भएको सत्ता सहकार्यको समझदारी अनुमोदन गर्नेछ । बैठक केहीबेरअघि पार्टी सभापति शेरबहादुर देउवाको निवास बूढानीलकण्ठमा सुरु भएको हो ।

बैठकमा सभापति शेरबहादुर देउवाले हिजोको भेटघाटबारे जानकारी गराएका छन् । मंगलबार साँझ एकीकृत समाजवादीका अध्यक्ष माधवकुमार नेपाल र देउवाबीच बूढानीलकण्ठमा छलफल भएको थियो । भेटमा पछिल्लो घटनाक्रमबारे छलफल भएको देउवाले बैठकमा जानकारी गराएका छन् । कांग्रेस र एमालेले सहकार्य गरेर राष्ट्रिय सहमतिको सरकार बनाउन लागेको जानकारी दिएपछि अध्यक्ष नेपालले पार्टीमा छलफल गरेर औपचारिक जानकारी गराउने बताएका थिए ।

पार्टी प्रवक्ता डा. प्रकाशशरण महतले एमालेसँग कांग्रेसले गरेको गठबन्धनका लागि भएका समझदारीलाई अनुमोदन गर्न कार्य सम्पादन समितिको बैठकमा छलफल भइरहेको जानकारी दिए । बैठकमा केन्द्रीय कार्यसम्पादन समितिका पदाधिकारी एवम् सदस्यहरूलाई उपस्थिति रहेको छ । 

कांग्रेस र एमालेबीच आलोपालो सरकारको नेतृत्व गर्ने, संविधान संशोधन गर्ने र नयाँ सरकारलाई राष्ट्रिय सहमतिको स्वरुप दिने लगायतका विषयमा समझदारी छ । कांग्रेस–एमालेले माओवादी केन्द्रका अध्यक्ष एवम् प्रधानमन्त्री पुष्पकमल दाहाल प्रचण्डलाई मार्गप्रशस्त गर्न आग्रह गरेका छन् । तर प्रचण्डले तत्काल राजीनामा नदिने बरु संसदमा विश्वासको मत सामना गर्ने तयारी गरेका छन् ।