ओली नेतृत्वमा एक मात्रै उपप्रधानमन्त्री हुने कुराले विष्णु पौडेल तनावमा

२० असार, काठमाडौं । नेपाली कांग्रेस र नेकपा एमालेबीच भएको सहमतिमा एक जनालाई मात्र उपप्रधानमन्त्री बनाउने चर्चा बाहिर आएपछि दोस्रो तहका नेताहरु तनावमा देखिन थालेका छन् । एमाले अध्यक्ष केपी शर्मा ओली नेतृत्वको सरकारमा उपप्रधानमन्त्री भएर जान खोज्ने नेताहरु कांग्रेस र एमालेमा धेरै छन् । उनीहरूबीच यसै पनि हानाथाप चलिरहेको छ ।  

संयुक्त सहमति अहिलेसम्म सार्वजनिक नभएपनि कांग्रेस सभापति शेरबहादुर देउवा र एमाले अध्यक्ष ओलीबीच एक जना मात्र उपप्रधानमन्त्री राख्ने सहमति भएको चर्चा व्याप्त छ । ओली प्रधानमन्त्री भएपछि कांग्रेसबाट गृहमन्त्रालय लिने भन्ने कुरा भएको हो । प्रधानमन्त्रीसहित अर्थ मन्त्रालय एमालेले लिने भनिएको छ । दुई दलबाट एक एक जना उपप्रधानसहित मन्त्री बन्ने भनिएको थियो । तर, अहिले आएर एक जना मात्र हुने भनेपछि उपप्रधानमन्त्री बन्ने तयारीमा लागेका नेतामा तनाव बढेको हाे । 

उता, कांग्रेसको शेखर कोइराला समूहले पनि यो सहमतिलाई आफ्नो एजेण्डा भनेको छ । नेता कोइरालाले कोशी प्रकरणदेखि नै कांग्रेस र एमाले मिलेर सरकार बनाउनुपर्ने कुराको पहल सुरु गरेका थिए । प्रायः जसो मञ्चमा बोल्दा र नेताहरूसँग कुराकानी गर्दा उनले देशलाई स्थिरता दिन पनि कांग्रेस र एमाले मिल्नुको विकल्प नभएको बताउँदै आएका थिए । उनले सभापति देउवासँग पनि पटक पटक एमालेसँग कुरा गर्न भनेका थिए । यो सहमतिमा उनैकै प्रयास बढी भएकाले सरकारमा पठाउने मन्त्रीहरूका विषयमा दमदार दावी राख्ने नै छन् । 

उपप्रधानमन्त्रीसहित नभएपनि मन्त्रीहरूमा भने कोइरालाको राम्रो दावी रहने बुझिएको छ । चर्चा अनुसार कांग्रेसबाट प्रमुख सचेतक समेत रहेका रमेश लेखककाे गृहमन्त्रीमा दावी रहेकाे बताइन्छ । उता राष्ट्रिय सभा सदस्य कृष्णप्रसाद सिटौला गृहसहित उपप्रधानमन्त्री बन्ने मध्येमा बढी चर्चा छ । उनीहरू दुवै जना लविङमा पनि छन् । यसपछि कांग्रेसबाट डा. शशांक कोइराला, ज्ञानेन्द्रबहादुर कार्की, विमलेन्द्र निधि र प्रकाशमान सिंहले पनि यो पटक कांग्रेसबाट सरकारमा जाने मन्त्रीहरूको नेतृत्व गर्न पाए हुन्थ्यो भनिरहेका छन् । निधि र सिंहले अब पालो नआउने भएकाले अन्तिम मौका दिनुपर्ने भन्दै पहल बढाएका छन् । 

नेता शशांक कोइरालाले गएको महाधिवेशनदेखि नै सभापतिलाई सहयोग गरिरहेको र अहिलेसम्म कुनै पद नलिएकाले आफूलाई यो पटक टोलीको नेतृत्व गरेर सरकारमा जाने अवसर दिनुपर्ने भनिरहेका छन् । सभापति देउवा पत्नी आरजु राणाको झन छुट्टै चाहना छ । उनी उपप्रधानसहित परराष्ट्रमन्त्री बन्ने दाउमा छिन् । उपप्रधान नपाए पनि परराष्ट्र भने पाउनै पर्ने अडान उनको छ । यी बाहेक कांग्रेसका अरु नेता भने कसरी मन्त्री बन्ने भन्ने दौडधुपमा लागेका छन् । 

उपप्रधानमन्त्रीको विषयलाई लिएर सरकारको नेतृत्व गर्ने एमालेभित्र पनि रडाको छ । ओलीका दुई विश्वास पात्र नेता उपाध्यक्ष विष्णु पौडेल र महासचिव शंकर पोखरेलका बीच मारामार छ । पोखरेल पौडेललाई राेक्ने रणनीतिमा उत्रिएका छन् । 

अर्थ मन्त्रालय एमालेले पाउने भनेपछि यसअघि पटक पटक उपप्रधानसहित अर्थमन्त्री भएका पौडेल आफूलाई ओलीले नछोड्नेमा ढुक्क छन् । एमालेमा अरु अर्थमन्त्रीका लागि दह्रो दावी प्रस्तुत गर्ने नेता पनि छैनन् । यसैले पनि पौडेलको दम बढेको छ । तर, महासचिव पोखरेल यसको विपक्षमा छन् । उनीहरुको लडाई विगत निर्वाचनदेखिकै हो । एकजना मात्र उपप्रधानमन्त्री बनाउँदा प्रधानमन्त्री भएको दलले नपाउने अवस्था छ । प्रधानमन्त्री र उपप्रधानमन्त्री एकै दलबाट हुने सहमति छैन ।  

पहिले नै उपप्रधानमन्त्री भइसकेका कारण पौडेललाई अर्थमन्त्री मात्र भएर जान्छु भन्न पनि सजिलो छैन । पौडेललाई रोक्न कै लागि पोखरेलले  एक मात्र उपप्रधानमन्त्री बनाउनुपर्ने पक्षमा कांग्रेससँग सहमति गरेका हुन । यसले पौडेलमा तनाव बढेकाे छ । किनकी देउवाकाे तर्फबाट लेखक र ओलीकाे तर्फबाट पाेखरेल वार्ता र सहमतिकाे खाका तयार गर्नेमा बसेका थिए ।

यसरी सरकार बनाउने तयारीमा रहेका कांग्रेस र एमालेभित्र उपप्रधानमन्त्रीको चिन्ता देखिएको छ भने राजीनामा दिन आनाकानी  गरिरहेका प्रधानमन्त्री प्रचण्डले पनि असार २३ मा विश्वासको मत लिने तयारी गरेको बताइएको छ । उनले २३ गते संसदमा विश्वासको मत फेस गर्ने जानकारी सभामुखलाई दिएको बुझिएको छ ।