कम्पनीले लापरवाही गरी वैकल्पिक व्यवस्था नगरेका कारण चन्द्रागिरि केबलकारमा अड्किए यात्रु

२ साउन, काठमाडौं । विद्युत सेवा बन्द भएकाले बेला सञ्चालन गर्न सकिने वैकल्पिक व्यवस्था नगरेका कारण चन्द्रागिरि केबलकारमा चढेका यात्रुहरू लामो समयसम्म भित्रै अड्किए । विद्युत सेवा अवरुद्ध हुँदा यात्रुहरू डिब्बामै अड्किन पुगेको प्रहरीले जनाएको छ ।  यसरी विद्युत सेवा अवरुद्ध भएको समयमा यात्रु फस्न सक्ने अवस्था हुन नदिनका लागि वैकल्पिक व्यवस्था गरिनुपर्थ्यो । तर, कम्पनीले लापरबाही देखाएको छ । ​​​​​​

आइएमई समूह अन्तर्गत सञ्चालनमा रहेको यस कम्पनीका केवलकारमा यस अघि पनि समस्या आएको थियो । करिब ८ वटा डिब्बा तारको लठ्ठामै अल्झिएका थिए । केबलकारमा अड्किएका यात्रु लामो समय अतालिए । कम्पनीले जेनेरेटर लगायतका कुनै पनि वैकल्पिक व्यवस्था गरेको थिएन ।  

उद्धारका लागि सशस्त्र प्रहरीको २६ जनाको प्रहरीको टोली चन्द्रागिरितर्फ गएको सशस्त्र प्रहरीका सहप्रवक्ता डीएसपी शैलेन्द्र थापाले जानकारी दिए । बुधबार दिउँसो साढे १ बजे चन्द्रागिरि नगरपालिकास्थित केलबकारमा प्राविधिक समस्याका कारण यात्रुहरू बीचमै अड्किएको खबर आएपछि सशस्त्रको टोली पुगेको हो ।  

यसरी फसेको खबरपछि नेपाल प्रहरी र सशस्त्र प्रहरी घटनास्थलमा खटिएको उनले जानकारी दिए । सुरुमा टावर नजिक भएका ८ जनाको उद्धार गरिएको थियो । कम्पनीले यसबारे कुनै जानकारी गराएको छैन । 

 अहिले भने केबलकारमा अड्किएका २५० जना यात्रुको उद्धार भइसकेको छ । करिब डेढ घण्टा अड्किएका यात्रुलाई केही समयअघिमात्रै उद्धार गरिएको प्रहरी वृत्त थानकोटका डीएसपी सूर्य सुवेदीले जानकारी दिए । उनका अनुसार केबलकारकै डिब्बामा अड्किएका आठ जनालाई प्रहरीले भर्‍याङ लगाएर उद्धार गरेको थियो । बाँकीलाई भने केबलकारकै चक्का घुमाएर उद्धार गरिएको हो । यो घटनाबाट कम्पनीले बैकल्पिक व्यवस्था नगर्दा भएको हो ।