मैले पत्र लेखेकी हुँ, अनैतिक कार्य गरेको छैनः उपसभामुख

४ साउन, काठमाडौं । उपसभामुख इन्दिरा राना मगरले अमेरिकी दूतावासलाई लेखेको पत्र करुणा भावले भएको र यसमा कुनै अरु गलत मनसाय नभएको बताएकी छन् । आफूले सहयोग गर्न खोजेको भए पनि अहिले आएर पत्र सार्वजनिक गर्नु नियोजित कदम भएको उनको भनाइ छ । 

उनले एक विज्ञप्ति जारी गर्दै यस्तो बताएकी हुन् । मलाई नजिकबाट चिन्नेहरू मेरो स्वभावसँग जानकार नै हुनुहुन्छ । मेरा स्वभावगत कमजोरीहरू धेरै होलान्, त्यसबाट फाइदा उठाउनेहरू पनि धेरै होलान् तर अनैतिक कार्य मबाट भएको छैन, हुने छैन, उनले भनेकी छन् ।

उपसभामुख रानाले करिब डेढ वर्षअघि अमेरिकी दूतावासलाई लेखेको पत्रका सम्बन्धमा सार्वजनिक प्रष्टीकरण दिएकी हुन् । जिम्मेवारी वहन गरेको केही साताभित्र आएका निमन्त्रणामा सँगै जानुपर्ने भनी आएको अनुरोधलाई स्वीकार गरी पत्र लेखेको उनले बताएकी छन् । उनले यसलाई आफू विरुद्धको नियोजित कदमका रूपमा चित्रण गरेकी छन् ।

आफूसँगै एउटै कार्यक्रममा सहभागी हुन निमन्त्रण आएको र उक्त कार्यक्रममा आफ्नो सहयोगीसमेत भइदिने हुँदा अन्तर्वार्ताका लागि मिति लिइदिन अनुरोध गरेपछि आफूले सो पत्र लेखेको उनको भनाइ छ । ‘मैले नेपालस्थित अमेरिकी राजदूतावासलाई अन्तर्वार्ताको मिति राखिदिन अनुरोधमात्र गरेको थिएँ । कसैलाई भिसा दिने वा नदिने स्वः निर्णय राजदूतावासले आफ्नो नीति र प्रक्रिया बमोजिम नै गर्ने हुन्छ । मैले कसैको भिसाका लागि अनुरोध गरेको छैन,’ उनले भनेकी छन् ।