हिंसात्मक गतिविधि बढेपछि बंगलादेशबाट काठमाडौं फर्किए ५६ जना विद्यार्थी

६ साउन, काठमाडौं । बंगलादेशमा जारी आरक्षण विरोधी आन्दोलनमा प्रभावित भएका नेपाली विद्यार्थी काठमाडौं फर्किन थालेका छन् । आइतबार ५६ जना विद्यार्थी काठमाडौं विमानस्थलमा अवतरण गरेका छन् । बंगलादेशको सवार क्षेत्रको इनाम मेडिकल कलेजमा पढ्ने उनीहरु स्वदेश फर्किएका हुन् ।

प्रर्दशन हिंसात्मक बन्दै गएपछि अध्ययनमा गएका ५६ जना नेपाली विद्यार्थी आइतबार नेपाल फर्किएका हुन् । उनीहरू विमान बंगलादेशको हवाईजहाजमार्फत काठमाडौं आएका हुन् । परराष्ट्र मन्त्रालयका प्रवक्ता अमृतबहादुर राईका अनुसार साढे ११ बजे उनीहरू त्रिभुवन अन्तर्राष्ट्रिय विमानस्थलमा उत्रिएका हुन् । 

१७ जना आउने कुरा थियो । ५६ जना आएको जानकारी प्राप्त भएको छ, उनले भने । बंगालदेशस्थित नेपाली दूतावासमा सञ्चार सर्म्पक हुन नसक्दा यकिन विवरण थाहा हुन नसकेको राईले बताए ।