सहमति कार्यान्वयन नभएपछि सहकारी पीडित आन्दोलनका लागि फेरी आए सडकमा

१७ साउन, काठमाडौं । सरकारसँग भएका सहमति कार्यान्वयन नभएको भन्दै सहकारी पीडितहरू आन्दोलनका लागि फेरी सडकमा आएका छन् । उनीहरुले बिहीबार काठमाडौंको रत्नपार्कबाट प्रदर्शन सुरु गरेका छन् । 

सरकारले पीडितका समस्या समाधान गर्न पटक–पटक सहमति गरे पनि कार्यान्वयन नगरेको भन्दै पीडितहरूले रत्नपार्क क्षेत्रमा सांग्लो बनाएर प्रदर्शन गरे । प्रदर्शनको नेतृत्व सहकारी बचतकर्ता संरक्षण राष्ट्रिय अभियान (महासंघ)ले गरेको छ । 

बचत फिर्ताका लागि विभिन्न चरणमा गरिएको आन्दोलन अनुसार सरकारसँग भएको सम्झौता कार्यान्वयनका लागि गत जेठ ११ गतेदेखि उनीहरुले रिले अनशन गरेका थिए । रिले अनशन ६५ दिन पूरा गर्दा पनि सरकार संवेदनहीन भएको पीडितहरुको गुनासो छ ।

सहकारीको रकम अपचलनका सम्बन्धमा छानविन गरेर कारवाही अगाडि बढाउन सरकारले संसदीय छानबिन विशेष समिति बनाएको छ । यो समितिले अहिले विभिन्न सरोकारवाला पक्षसँग छलफल गरिरहेको छ । सहकारीमा राखिएको बचत रकम दुरुपयोग भएको विषय अहिले अनुसन्धानमा छ ।  

तस्बिर : नेपाल फोटो लाइब्रेरी