आजै केही एआईजीको सरुवा तयारी, पाँच बजे मन्त्रिपरिषद बैठक

२२ साउन, काठमाडौं । नेपाल प्रहरीमा केही एआईजीहरुको जिम्मेवारी हेरफेर हुने संभावना रहेको छ । आज साँझ बस्ने मन्त्रिपरिषद बैठकले एआईजीहरुको जिम्मेवारी हेरफेर गर्ने संभावना रहेको गृह मन्त्रालय स्रोतले जनाएको छ ।

एआईजी श्याम ज्ञवालीलाई प्रदेश समन्वय विभागमा सरुवाको तयारी भएको छ । सीआईबीमा काठमाडौं उपत्यका कार्यालयबाट दीपक थापा, अपराध अनुसन्धान विभागबाट टेकबहादुर तामाङ वा एकेडेमीबाट सुदीप गिरी मध्ये एकलाई पठाउने तयारी भएको स्रोतले जनाएको छ ।

यसैगरी कार्य विभागमा रहेकी किरण बज्राचार्यलाई पनि राम्रो जिम्मेवारी दिने संभावना रहेको स्रोतले जनाएको छ । ६० किलो सुन तस्करी प्रकरणमा अनुसन्धान गरेकी बज्राचार्यलाई डिल्लीराज आचार्यको सुन आयोगले कारवाहीको सिफारिस गरेको भन्दै रवि लामिछाने नेतृत्वको गृहमन्त्रालयले हतारमा सरुवा गरेकाे थियो ।

सुन तस्करीमा माओवादीको कनेक्शन पत्ता लगाउने उनलाई माओवादी निकट रहेका आचार्यले प्रतिशोधपूर्ण ढंगले आरोप लगाएको भन्दै आलोचना भएको थियो । आजको मन्त्रिपरिषद बैठकले एआईजी रामदत्त जोशीको पनि प्रहरी प्रधान कार्यालयमा पदस्थापन गर्ने बताइएको छ ।

यसैगरी गृहमन्त्रालयले रिक्त रहेको दुई डीआईजी पदमा एसएसपीको सिफारिस गर्ने बताइएको छ । एसएसपी सिद्धि विक्रम शाह, गणेश चन्द, भोला रावल मध्येबाट सिफारिस गर्ने संभावना रहेको स्रोतको दावी छ ।