गृहमन्त्री लेखकले बुझे त्रिशुलीमा बस बेपत्तासम्बन्धी अध्ययन कार्यदलको प्रतिवेदन

२२ साउन, काठमाडौं । गृहमन्त्री रमेश लेखकले सिमलताल दुर्घटना अध्ययन कार्यदलले बुझाएको प्रतिवेदन बुझेका छन् । मंगलबार मन्त्रालयमा आयोजित एक कार्यक्रमका बीच कार्यदलले गृहमन्त्री रमेश लेखकलाई प्रतिवेदन बुझाएको हो । प्रतिवेदनमा घटनाको अवस्थाबारे समग्र विश्लेषण गरिएको छ ।  

कार्यदलले दुर्घटनाको कारण, मृतक परिवार पाउनुपर्ने क्षतिपूर्ति र आगामी दिनमा यस्ता दुर्घटना हुन नदिन के गर्न सकिन्छ भन्ने विषय समेटेर कार्यदलले प्रतिवेदन तयार जनाएको छ । गएको असार २८ गते वीरगन्जबाट काठमाडौँ आउँदै गरेको बागमती प्रदेश ०३–००६ ख १५१६ नम्बरको एञ्जल डिलक्स र काठमाडौँबाट गौर जाँदै गरेको बागमती प्रदेश ०३–२४९५ ख ००१ नम्बरको गणपति डिलक्सको बस पहिरोसँगै बगेर त्रिशूली नदीमा बेपत्ता भएका थिए । 

कार्यदलका संयोजक समेत रहेका गृहमन्त्रालयका सहसचिव छवि रिजालले मन्त्री लेखक समक्ष प्रतिवेदन पेस गर्दै दुवै बसमा सवार ६५ जनामध्ये तीन जना सकुशल निस्किएका र ६२ जना बेपत्ता भएको उल्लेख गरेका छन् । लेखकले आफू मन्त्रीमा नियुक्त भएपछि असार ३१ गते दुर्घटना अध्ययनका लागि कार्यदल गठन गर्ने निर्णय गरेका थिए ।