सेनाको हेलिकोप्टरबाट काठमाडौंको टिचिङ अस्पतालमा ल्याइयो बागलुङका घाइते

२३ साउन, पोखरा । पहिरोमा परि घाइते भएका बागलुङको बडिगाड गाउँपालिका वडा नम्बर १० आरुपाटाका ३ जना घाइतेलाई थप उपचारका लागि काठमाडौं टिचिङ अस्पतालमा ल्याएको छ । बुधबार नेपाली सेनाको हेलिकोप्टरमार्फत गम्भीर घाइते ३ जनालाई शिक्षण अस्पताल ल्याएको हो । 

बडीगाड–१० आरुपाटामा सुरक्षित ठानेर आश्रय लिएकै घरमा पहिरो खस्दा ६ जनाको मृत्यु भएको थियो । ४ जना अझै बेपत्ता छन् र ९ जना घाइते छन् । गम्भीर घाइते बनेका घरधनी जोगबहादुर बुढाको उपचार नपाएर मृत्यु भएको थियो ।

हेलिकोप्टरमार्फत ३१ वर्षीया सीता थापा, १९ वर्षीया रिमा पुन र ४६ वर्षीय संगीता बुढालाई उपचारका लागि टिचिङ ल्याएको छ । अन्य घाइतेलाई थप उपचारका लागि बुर्तिबाङ अस्पताल लगिएको बागलुङका सहायक प्रमुख जिल्ला अधिकारी चित्रांगत बरालले जानकारी दिए ।

पहिरोमा पुरिएर घरधनी जोगबहादुर बुढा, छिमेकी ७० वर्षीया मोतीदेवी कामी, सिर्जना विकको ६ महिनाकी छोरी सीता विक, ७ वर्षकी मालती बुढा, ८ वर्षीय अमन बुढा र ११ वर्षीया सीता पुनको मृत्यु भएको थियो । मधु बुढा, ३ वर्षीय आरुष थापा, १० वर्षीय मनोज बुढा र ११ वर्षीय सुमन विक बेपत्ता छन् । बेपत्ताको खोजी कार्य भइरहेको सहायक सीडीओ बरालले जानकारी दिए । 

२६ वर्षीय ओमप्रसाश पुन, २३ वर्षीया सिर्जना विक, ४३ वर्षीय मंगल सेनबुढा, ६० वर्षीया सुमित्रा विक, ५१ वर्षीय सशीराम विक र ९ वर्षीय ज्ञाने बुढालाई उपचारका लागि बुर्तिबाङमा भइरहेको छ ।