भारतीय विदेश सचिव मिस्रीको भ्रमण: राष्ट्रपति, प्रधानमन्त्री र चारमन्त्री भेट्ने, द्विपक्षीय छलफल नहुने

२७ साउन, काठमाडौं । आइतबार विहान काठमाडौं आइपुगेका भारतीय विदेश सचिव विक्रम मिस्रीको  नेपाल भ्रमणमा द्विपक्षीय छलपल नहुने भएको छ । उनी त्रिभुवन अन्तर्राष्ट्रिय विमानस्थलमा परराष्ट्र सचिव सेवा लम्सालले स्वागत गरेपछि सिधै विमानस्थलबाट भारतीय दूतावास लैनचौर पुगेका थिए । 

मिश्रीको दुई दिने नेपाल भ्रमणमा नेपाल–भारत द्विपक्षीय प्रतिनिधिमण्डलस्तरिय बैठक नहुने परराष्ट्र सौले जानकारी दिएको छ । मिश्रीको भ्रमणमा परिचयात्मक मात्र हुनेछ । नेपालका परराष्ट्र सचिव लम्सालको निमन्त्रणामा विदेश सचिव मिस्री आएका हुन् । विदेश सचिव भएपछि उनको यो पहिलो नेपाल भ्रमण हो भने नेपालमा केपी ओलीको नेतृत्वमा नयाँ सरकार बनेपछि भारतबाट पहिलो भ्रमण हो ।

विदेश सचिव मिस्रीले २ बजे राष्ट्रपति रामचन्द्र पौडेल र त्यसपछि ३ बजे प्रधानमन्त्री केपी शर्मा ओलीसँग शिष्टाचार भेटवार्ता गर्न जाने कार्यक्रम छ । उनले उपप्रधान तथा शहरी विकासमन्त्री प्रकाशमान सिंह र अर्का उपप्रधान तथा अर्थमन्त्री विष्णुप्रसाद पौडेल तथा गृहमन्त्री रमेश लेखकसँग पनि शिष्टाचार भेटवार्ता गर्ने कार्यक्रम रहेको छ ।

आइतबार बेलुकी परराष्ट्र सचिव लम्सालले समकक्षी मिस्रीलाई रात्रीभोज दिने छिन् । सोमबार ११ बजे परराष्ट्रमन्त्री आरजु राणा देउवासँग शिष्टाचार भेटवार्ता गरि बेलुकी नयाँ दिल्ली फर्कने कार्यक्रम रहेको छ ।