सर्वोच्च अदालतबाट माओवादीका प्रवक्ता सापकोटाविरुद्ध पक्राउ आदेश जारी हुनसक्ने

१२ भदौ, काठमाडौं । नेकपा माओवादीका प्रवक्ता एवं पूर्वसभामुख अग्निप्रसाद सापकोटाविरुद्ध सर्वोच्च अदालतले पक्राउ आदेश गर्न सक्ने बुझिएको छ । २०६९ मंसिरमा दर्ता भएको हत्यासम्बन्धी मुद्दामा सर्वोच्चले बुधबार निर्णय दिने भएको हो । अन्य कुनै प्राविधिक कारण नआएमा उनीविरुद्धको मुद्दाको फैसला आज हुनेछ । सर्वोच्च स्रोतका अनुसार संक्रमणकालीन न्यायसम्बन्धी विधेयकलाई लिएर यस मुद्दाको फैसला नहुने सम्भावना पनि छ । 

संक्रमणकालीन न्याय सम्बन्धि टीआरसी विधेयक हालै मात्र पारित भएको छ । यो विधेयक अनुसार सवोच्चले पनि सत्यनिरुण तथा मेलमिलाप आयोग गठनभएपछि सोही आयोगले हेर्ने गरी निर्णय दिनसक्छ, स्रोतले भन्यो । अन्यथा सापकोटाविरुद्ध संवैधानिक इजलासले फैसला सुनाउनेछ ।    

काभ्रेका अर्जुन लामाको हत्या आरोपमा सापकोटासहितका नेताहरूमाथि अनुसन्धान हुनुपर्ने भन्दै उनकी श्रीमती पूर्णिमाया लामाले २०६९ को मंसिरमा सर्वोच्चमा रिट दायर गरेकी थिइन् । त्यो रिट सरेको सरेकै भएर यहाँसम्म आइपुगेको छ । संवैधानिक इजलासले बुधवार सो मुद्दाको फैसला सुनाउने मिति तोकेको थियो भने त्यही अनुसार पेशी रहेको छ । यसअघि असार १२ गते एक न्यायाधीश अनुपस्थित भएपछि मिति सरेको थियो ।     
काभ्रेका अर्जुन लामाको हत्या आरोपमा कर्तव्य ज्यान मुद्दामा अनुसन्धान माग गर्दै दायर भएको रिटमा जेठ २३ गते बहस सकिएर निसु तोकिएको थियो । संवैधानिक इजलासले दुवै पक्षको बहसपछि निर्णय सुनाउने भनेपनि वरिष्ठतम न्यायाधीश प्रकाशमान सिंह राउत उपस्थित नहुँदा रोकिएको थियो । गत जेठ २३ गते प्रधानन्यायाधीश श्रेष्ठ, प्रकाशमान सिंह राउत, सपना प्रधान मल्ल, प्रकाशकुमार ढुंगाना र कुमार रेग्मी रहेको संवैधानिक इजलासले सुनुवाइ सकेर निर्णय सुनाउने मिति असार १२ गते तोकेको थियो । 

त्यस यता मिति सर्दै आजको मितिमा आएको हो । प्रतिवादीहरूले यो घटना द्वन्द्वकालीन भएकाले संक्रमणकालीन न्यायसम्बन्धी संयन्त्रले हेर्नुपर्ने माग गरेका थिए । इजलासले दुवैको तर्क सुनेर फैसला सुनाउन लागेको हो । अर्को तर्फ संक्रमणकालीन न्यासम्बन्धीको टीआरसी विधेयक हालै मात्र संस्दबाट पारित भएकाले सर्वोच्चले यसमा पुनःविचार गर्न सक्ने पनि देखिएको छ ।