संगठन हाक्न नेपाल प्रहरीमा ११ सय इन्सपेक्टर छन, सबैलाई कमाउने अड्डा चाहिएको छः आईजीपी

१२ भदौ, रुपन्देही । नेपाल प्रहरीका महानिरीक्षक बशन्त कुँवरले प्रहरी संगठनभित्र करप्सनले प्रश्रय पाएको बताएका छन् । उनले संगठनभित्र अब निर्मम बन्नुपर्ने अवस्था आएको भन्दै सवै प्रहरी कर्मचारीको बैंक खाता जाँच गरिने बताएका छन् । उनले प्रहरी कर्मचारी, उसका आफन्त र नजिक देखिएका साथीभाइको पनि बैंक खाता जाँच हुने बताए ।  

बुधबार जिल्ला प्रहरी कार्यालय रूपन्देहीको नवनिर्मित भवनको उद्घाटन गर्दै उनले प्रहरी कर्मचारी, परिवार र साथीहरू समेतको बैंक खाता जाँच गरिने बताएका हुन् । महानिरीक्षक कुँवरले हाल कार्यरत एक जना डीआईजीमाथि संगठनले कारवाही गर्न लागेको जानकारी दिए । उनले भने, ‘हामीले डिआइजीसाबसम्म पनि करप्सनमा कारबाही गर्दछौं, तपाईं सबैले बुझ्नुपर्छ । म–म भन्नुस् । तपाईंको परिवारको खाता चेक गर्दै छौं हामी । तपाईंहरूको खाता चेक गर्दैछौं हामी । तपाईंहरूको साथी संगतीको खाता पनि चेक गर्दैछौं ।’

एक जना प्रहरी नायब महानिरीक्षक (डिआइजी) फस्न लागेको बताए पनि उनले ती डिआइजीको नाम भने खुलाएका छैनन् । अहिले एक जना डिआइजीसाब फस्दै हुनुहुन्छ । त्यसैले यी कुराहरू बुझ्नुस् । निर्मम हुनुपर्ने अवस्था छ । धेरै ठाउँमा हामीले एसपी तानेका छौं, कारण करप्सनको हो ।’

नेपाल प्रहरीमा रहेका धेरैजसो प्रहरी निरीक्षकहरू ट्राफिक बन्न चाहेको र अधिकांश मधेशमा जान रूचाउने पनि उनले बताए । ट्राफिक–ट्राफिक–ट्राफिक, किन ट्राफिक ? अहिले मसँग ११ सय इन्सपेक्टरहरू छन् । त्यसमध्ये सबै इन्स्पेक्टरहरू तराई जान खोज्छन् । कमाइ हुने अड्डा खोज्छन किन ? प्रत्येक जवान तराइको अझ लुम्बिनी र मधेसको सीमा चौकी जान खोज्छ किन ? काम एउटै होइन ? त्यसकारण यी सबै कुरामा अब छानविन हुन्छ । सचेत गराउन चाहन्छु, उनले भने ।

उनका अनुसार यति बेला प्रहरीका इन्सपेक्टरहरूको सरुवाको तयारी भइरहेको छ । सरुवा हुने इन्सपेक्टरहरू सवैले राम्रो ठाँउमा जान खोजिरहेका छन् । उनीहरु आफूले चाहेको क्षेत्रमा जान विभिन्न प्रहरी नेतृत्वलाई प्रभावित बनाउन खोजिरहेका छन् । राजनीतिक शक्तिको प्रयोग गरिरहेका छन् ।