कांग्रेस बैठकको निष्कर्ष, महाअभियोगको प्रक्रियामा जानुभन्दा उपसभामुखले राजीनामा दिनु उपयुक्त हुन्छ

२६ भदौ, काठमाडौं । नेपाली कांग्रेसको पदाधिकारी तथा पूर्व पदाधिकारी बैठकले उपसभामुख इन्दिरा रानामगरले पदबाट राजीनामा दिनु नै अहिलेको उपयुक्त निकास हुने ठहर गरेको छ । कांग्रेसले उपसभामुखलाई परिस्थिति बुझेर राजीनामा दिन भनेको छ । 

बुधबार बिहान बसेको बैठकले असम्बन्धित मानिसहरूको भिसाका लागि अमेरिकी दूतावासमा चिठ्ठी लेखेर उपसभामुखले अनुचित काम गरेको ठहर गर्दै उपसभामुखले राजीनामा दिनुपर्ने निष्कर्ष निकालेको हो । उपसभामुख रानामगरले राष्ट्रसंघको ‘कमिसन अन द स्टाटस अफ वुमेन’ को ६७ औं सत्रमा सहभागी हुन पाँच जनाको अन्तर्वार्ता अगाडि सारिदिन नेपालस्थित अमेरिकी दूतावासलाई पत्र लेखेकी थिइन् ।

चार पुरुष र एक महिलाका लागि उपसभामुखले पत्र लेखे पनि अमेरिका जान भने पाएका थिएनन् । २०२३ को फेब्रुअरीमा लेखेको त्यही पत्र केही समय अघि सार्वजनिक भएको थियो । पत्र सार्वजनिक भए लगत्तै उपसभामुख गम्भीर विवादमा परेकी छिन् । सोमबार साँझ प्रधानमन्त्रीको निवास बालुवाटारमा बसेको सत्ता साझेदार दलहरूको बैठकमा पनि उपसभामुख राना मगरको विषयले प्रवेश पाएको थियो ।  

कांग्रेस प्रमुख सचेतक श्याम घिमिरेले बैठकमा महाअभियोगको प्रक्रियामा जानुभन्दा रानामगरले बहिर्गमनको बाटो रोज्नु राम्रो हुने निष्कर्ष निकालेको बताए । उपसभामुख रानाले राजीनामा दिनुपर्ने विषय मंगलबारको संसद बैठकमा पनि उठेको छ । रास्वपा र माओवादीले भने उपसभामुख रानाको बचाउ गरेको छ ।