पैसा धेरै भएपछि तरलता व्यवस्थापनमै कठिन, एक सातामा राष्ट्र बैंकले खिच्यो १ खर्ब ४० अर्ब

२७ भदौ, काठमाडौं । बैंक तथा वित्तीय संस्थामा पैसा धेरै जम्मा भएपछि नेपाल राष्ट्र बैंकले तरलता व्यवस्थापनका लागि बजारबाट रकम खिचिरहेको छ । यस क्रममा राष्ट्र बैंकले भदौ २३ गते १ खर्ब तानेको थियो भने हिजो बुधबार ४० अर्ब रकम बजारबाट तानेको छ । 

अहिले ऋण दिन मिल्ने रकम थुप्रिने क्रम रोकिएको छैन । निक्षेप बढिरहेको बेला कर्जा माग बढ्न नसक्दा बैंक तथा वित्तीय संस्थामा तरलता थुप्रिएको हो । यहीकारण तरलता व्यवस्थापनका लागि भन्दै राष्ट्र बैंकले बजारबाट रकम खिचेको हो । राष्ट्र बैंकले ४० अर्ब झिक्न बुधबार बोलकबोल गरेको हो । तरलता व्यवस्थापनका लागि निक्षेप संकलन उपकरणमार्फत राष्ट्र बैंकले २१ दिनका लागि उक्त रकम झिकेको छ । 

अन्तर बैंक ब्याज दर तीन प्रतिशतभन्दा तल झरेपछि फेरि बजारबाट पैसा झिकिएको राष्ट्र बैंकले जनाएको छ । हालको व्यवस्थाअनुसार अन्तर बैंक ब्याजदर तीन प्रतिशतभन्दा तल रहेको अवस्थामा राष्ट्र बैंकले बजारबाट पैसा झिक्नुपर्छ भने ६.५ प्रतिशतभन्दा बढी भएपछि बजारमा पैसा पठाउनुपर्छ । अहिले तीन प्रतिशतभन्दा तल झरेकाले फेरि बजारबाट पैसा झिकिरहेको छ ।