लामो टसलपछि कोशी सरकारमा कांग्रेस सहभागी, गृह प्रदेशमै कोइराला पक्षले पाएन भाग

२८ भदौ, विराटनगर । नेपाली कांग्रेस कोशी प्रदेश सरकारमा सहभागी भएको छ । कांग्रेसबाट तीन मन्त्री र एक राज्यमन्त्रीले आज शपथ ग्रहण गरेका छन् । कांग्रेसले सरकारमा जाने मन्त्रीहरूको नाम टुंगो लगाएर मुख्यमन्त्रीलाई बुझाएपछि मन्त्रिपरिषद विस्तार भएको हो । 

मन्त्री बन्नेमा शेखर कोइराला पक्षबाट कोही पनि परेका छैनन् । कोशी प्रदेश कोइरालाको गृह प्रदेश हो । विवादकाबीच लामो समयपछि कांग्रेसले मन्त्रीको नाम टुङ्ग्याएको थियो । प्रदेश महामन्त्रीसमेत रहेका प्रदेश सभा सदस्य भुपेन्द्र राईको नेतृत्वमा कांग्रेस सरकारमा सहभागी भएको हो । कृष्णप्रसाद सिटौला समूहका राई भौतिक पूर्वाधार मन्त्री बनेका छन् । सिटौला पक्षकै भूमि राजवंशी भौतिक पूर्वाधार राज्यमन्त्री बनेका छन् ।

यसैगरी खगेनसिंह हाङ्गाम उद्योग कृषि तथा सहकारी मन्त्री र सदानन्द मण्डल पर्यटन, वन, वातावरण मन्त्री बनेका छन् । हाङ्गाम सभापति शेरबहादुर देउवा समूहका हुन् भने मण्डल संस्थापन भित्रकै ज्ञानेन्द्र कार्की निकट मानिन्छन् । गत साउन १२ मा नै सरकारमा सहभागी हुने निर्णय गरेको कांग्रेस कोइराला समूहको २ मन्त्रीको अडानका कारण सरकारमा सहभागी भएको थिएन । 

आज भने शेखर समूहविना कांग्रेस कांग्रेस सरकारमा सहभागी भएको हो । आन्तरिक विवादका कारण मन्त्री छान्न नसकेपछि कोशीमा मन्त्रिपरिषद् विस्तार हुन सकेको थिएन । कोशी कांग्रेस संसदीय दलका नेता उद्धव थापाले तीन मन्त्रीसहित एक राज्यमन्त्रीको नाम मुख्यमन्त्री हिक्मत कार्कीलाई शुक्रबार बिहान बुझाएका थिए ।