सुगर विरामीका कारण डाइभर्ट भएको भिस्ताराको जहाज बाँकी यात्रु बोकेर दिल्ली उड्यो

२८ भदौ, काठमाडौं । शुक्रबार १ सय ६१ जना यात्रु बोकेर दिल्लीका लागि उडिसकेको भिस्तारा एयरको जहाज एक विरामीका कारण पार्किमा डाइभर्ट गर्नुपर्यो । जहाजको बोर्डमा बसेका डायबिटिजका यात्रुको सुगर एकाएक बढेर अप्ठ्यारो भएपछि दिल्ली उड्नै लागेको जहाज पुनः पार्किङ–वेमै फर्काइएको थियो । 

उक्त जहाज अहिले दिल्ली पुगिसकेको छ । त्रिभुवन अन्तर्राष्ट्रिय विमानस्थलका प्रवक्ता रिन्जी शेर्पाका अनुसार, ११ः३० बजे दिल्ली फर्किने तालिका रहेको भिस्ताराको यूके–१५८ उडान नम्बर भएको न्यरोबडी जहाज धावनमार्गको टेकअफ विन्दुमा पुगेर पुनः पार्किङ वेमै फर्किएको हो ।

१ सय ६१ जना यात्रु राखेर दिल्ली जान लागेको जहाजभित्र रहेकी एक महिला यात्रुले आफूलाई सुगर बढेका कारण अप्ठ्यारो भएको जानकारी दिएपछि चालक दलले जहाज उडिसके पछि पायक पर्ने अन्तर्राष्ट्रिय विमानस्थलमा डाइभर्ट गर्दा चुनौती थपिने भएकाले काठमाडौंमै ओराल्ने निर्णय लिएका थिए । 

यात्रुलाई जहाजबाट झारे लगत्तै एम्बुलेन्समा राखेर सिनामंगलस्थित काठमाडौं मेडिकल कलेज पठाइएको थियो । त्यसपछि बिरामीलाई झारेर भिस्तारा दिल्ली उडेको थियो । दिल्ली–काठमाडौं दैनिक दुई वटा उडान गर्ने भिस्ताराको शुक्रबारको यो पहिलो उडान थियो ।