सहकारी प्रकरणको छानविन प्रतिवेदनलाई अन्तिम रूप दिन संसदीय समितिले बोलायो गृहमन्त्री

२८ भदौ, काठमाडौं । सहकारीका बचतकर्ताको रकम अपचलन भएको सम्बन्धमा छानबिन गर्न बनेको संसदीय विशेष समितिले प्रतिवेदनलाई अन्तिम रूप दिने तयारी गरेको छ । समितिले अन्तिम छलफलमा लागि गृहमन्त्री रमेश लेखक, गृह सचिव र प्रहरी प्रमुखसहितलाई छलफलका लागि बोलाएको छ ।  

समितिको कार्यालयमा शुक्रबार ४ बजे गृहमन्त्रीसहितका अधिकारीलाई बोलाइएको हो । सहकारी संस्था बचत रकम दुरुपयोग सम्बन्धमा संसदीय छानबिन समितिले प्रतिवेदनलाई अन्तिम रूप दिन छलफल राखेको हो । आजको बैठकबाट प्रतिवेदनलाई अन्तिम रूप दिइनेछ ।  

यसअघि समितिले सहकारी दुरुपयोगमा आरोपित, पीडित, सरोकारवाला निकाय लगायतसँग विभिन्न चरणमा छलफल गरेको थियो । यस अगाडि तोकिएको तीन महिनाभित्र प्रतिवेदन तयार हुन नसकेपछि प्रतिनिधिसभाले १५ दिनको म्याद थप गरेको छ ।