नेपाल एयरलाइन्सलाई दिएको ऋण चाँडो उठाउन सञ्चय कोषलाई अर्थमन्त्रीको निर्देशन

१ असोज, काठमाडौं । अर्थमन्त्री विष्णु पौडेलले नेपाल वायुसेवा निगमलाई दिएको ऋण चाँडो उठाउने व्यवस्था गर्न सञ्चय कोषलाई निर्देशन दिएका छन् । निगमबाट उठाउनुपर्ने लगानी उठाउने तर्फ ध्यान दिनुपर्ने उनीको भनाइ छ । सोमबार कर्मचारी सञ्चय कोषको ६३ औँ वार्षिकोत्सव कार्यक्रममा उनले यस्तो निर्देशन दिएका हुन् । 

अर्थमन्त्री पौडेलले सरकार ग्यारेन्टी बसे पनि ऋण उठाउन ताकेता गर्नुपर्ने बताए । वायुसेवा लगायत अन्य ठाउँमा लगाएको लगानीले कस्तो प्रतिफल दियाे भन्ने बारेमा पनि उनले चासो राखेका थिए । उनले कोषले गरेको लगानी धेरै ठाउँमा उठ्न नसकेको भन्दै कोषले गरेको लगानी फिर्ता ल्याउन निर्देशन दिए । कर्मचारी सञ्चय कोषले गरेको लगानीको प्रतिफलका विषयमा समीक्षा गर्न जरुरी भएको औंल्याउँदै निगमसँग भएको २७ अर्ब बढी लगानी उठाउन आवश्यक भएको बताए । 

कर्मचारी सञ्चय कोषले गरेको लगानीको प्रतिफल के भइरहेको छ । संस्थाले त्यस तर्फ पनि ध्यान दिनुपर्छ । नेपाल वायुसेवा निगममा लगाएको लगानीको सरकार ग्यारेन्टी बसेको छ । त्यसमा २७ अर्ब बढी लगानी भएको छ । त्यो रकम उठाउन पहल गर्नुपर्यो, सरकार ग्यारेन्टी बसेको छ भनेर बस्नु भएन ।