कांग्रेसको सय दिने अभियानमा जिल्ला जाने प्रतिनिधिलाई सानेपामा आज प्रशिक्षण

२ असोज, काठमाडौं । नेपाली कांग्रेसले पार्टी सुदृढीकरण र संगठन विस्तारका लागि सुरु गर्न लागेको सय दिने अभियानमा जिल्ला जाने प्रतिनिधिहरूका लागि बुधबार सानेपामा प्रशिक्षण (अभिमुखीकरण) दिन लागेको छ । प्रतिनिधि छनोट गर्न ढिलाइ भएका कारण असोज १ गतेदेखि सुरु गर्ने भनिएको कार्यक्रम सुरु भएको छैन् । आज प्रतिनिधिहरूलाई प्रशिक्षण दिएर जिल्ला पठाउने कांग्रेसको तयारी छ । 
 
सभापति देउवाले प्रशिक्षणका लागि दिउँसो २ बजे पार्टी कार्यालय सानेपामा पार्टीका पदाधिकारी,केन्द्रीय सदस्य, सांसद र पूर्व केन्द्रीय सदस्यहरूलाई सानेपामा बोलाएका छन् । १६ गते सम्म पार्टीको केन्द्रीय समिति बैठकले सय दिने सांगठनिक अभियान सञ्चालन गर्ने निर्णय गरेको थियो । असोज १ गतेबाट सुरु गरेर पुस १० गते सम्म अभियान सञ्चालन गर्ने कांग्रेसको तयारी थियो । 

यसका लागि भदौ ३० भित्र प्रतिनिधि जिल्ला जिल्लामा पठाउने कांग्रेसको तयारी थियो । अभियान अन्तर्गत पार्टीको सबै तहका सांगठनिक गतिविधिलाई प्रभावकारी बनाउन प्रतिनिधिहरूले भूमिका खेल्ने रहेको छ । यसका लागि कांग्रेसले यसअघि नै ४१ बुँदे टीओआर दिएको छ । महामन्त्री विश्वप्रकाश शर्माले ४१ बुँदे निर्देशन तयार पारेका थिए । त्यो केन्द्रीय समितिले अनुमोदन गरिसकेको छ ।