रविलाई पोखरेलको प्रश्न, तपाईंले सीईओका रुपमा मनलाग्दी पैसा खर्च गर्न मिल्ने, अनि दायित्व भित्र नपर्ने ?

२ असोज, काठमाडौं । नेकपा एमालेका महासचिव शंकर पोखरेलले वैकल्पिक राजनीतिले कस्तो विकल्प र सुशासन दिन खोजेको हो भन्दै राष्ट्रिय स्वतन्त्र पार्टीका सभापति रवि लामिछाने लक्षित प्रश्न गरेका छन् । रास्वपा र रविको नाम नलिई महासचिव पोखरेलले सामाजिक सञ्जालमा यस्तो प्रश्न गरेका हुन् ।

‘कुनै कम्पनीको सीईओले आफ्नो कम्पनीमा पैसा कहाँबाट आउँछ र त्यसरी आएको पैसाको दायित्व के हो भन्ने जानकारी नै नराखी विना लगानी त्यसको शेयर होल्डर बन्छ र  सीईओको रुपमा मनलाग्दी पैसा खर्च गर्दछ । अनि उसले गरेको त्यो काम उसको दायित्व भित्र पर्दैन भनेर जान्नेलाई छान्ने भन्ने राजनीतिक अभियानका दिग्गज अभियान कर्ताहरुले भनेको सुन्दा वैकल्पिक राजनीतिले कस्तो विकल्प र सुशासन दिन खोजेको हो स्पष्टै भयो । हैन र ?’

उनले सीईओका रुपमा जिम्मेवारी लिएको व्यक्ति कम्पनीका स्रोत र साधनको भरपूर प्रयोग गर्ने तर, त्यसको जिम्मेवारी लिनु नपर्ने कस्तो सीईओ हो भनेर प्रश्न गरेका छन् । सहकारी ठगी प्रकरणको छानबिन गर्न बनेको संसदीय छानबिन विशेष समितिले प्रतिनिधि सभामा बुझाएको प्रतिवेदनमा रविमाथि कारवाही गर्नु पर्ने सिफारिस गरे पनि रविले भने आफूले सफाइ पाएको बताउँदै आएका छन् । महासचिव पोखरेलले यसै प्रति लक्षित गर्दै टिप्पणी गरेका हुन् ।