साउनमा भ्वाङ परेको कमलादीको सडकलाई आएन दशैं

१९ असोज, काठमाडौं । गत साउन २५ मा कमलादीमा भ्वाङ परेको सडक अझै बनाउन नसक्दा ट्राफिक व्यवस्थापनमै समस्या देखिएको छ । काठमाडौं महानगर कार्यालय कमलादी नजिकै सडक भासिएपछि भ्वाङ परेको छ । टुकुचा खोलामाथि बनाइएको सडक भासिँदा आवागमन रोकिएको छ । महानगरको कार्यालय काठमाडौं प्लाजादेखि उत्तर तर्फको सडक भासिएको तीन महिना हुन लाग्यो ।

दरबारमार्गस्थित महेन्द्र सालिकबाट कमलादीको कृष्ण पाउरोटी चोक निस्किने एकतर्फी सडक भासिएको हो । भासिएको सडकमा प्रहरीले सवारी चलाउन रोक लगाएको छ । भ्वाङ परेको सडक अलपत्र छ । उक्त ठाउँलाई सामान्य डोरी टाँगेर घेरिएको छ । समयमै सडक नबन्दा यो खण्डमा ट्राफिक जाम नभएको दिन हुँदैन । ट्राफिक प्रहरी वृत्त दरबारमार्गलाई सधैं ट्राफिक व्यवस्थापन गर्न हम्मेहम्मे पर्छ ।