डा. खतिवडाको भविष्य बामदेवको इच्छामा निर्भर

१५ भदौ, काठमाडौं । अबको पाँच दिन भित्र भगवान दाहिना भएनन् भने अर्थमन्त्री डा. युवराज खतिवडा घर बस्नेमा पर्नेछन् । संघीय संसदको सदस्य नरहेका डा. खतिवडालाई राष्ट्रियसभामा रिक्त सांसदका रुपमा प्रधानमन्त्री केपी ओलीले सिफारिश गरेनन् भने उनको बहिर्गमन निश्चित छ ।

यद्यपि प्रधानमन्त्री ओली डा. खतिवडाप्रति सकारात्मक छन्, तर ओलीको एकल निर्णयबाट मात्रै खतिवडाको सांसद पद दोहरिन भने अहिले सहज देखिंदैन । पार्टीका अर्का अध्यक्ष पुष्पकमल दाहाल ‘प्रचण्ड’ र अर्का नेता माधवकुमार नेपाल डा. खतिवडाप्रति त्यति सकारात्मक छैनन् । पार्टीमा कुनै योगदान नरहेका व्यक्तिलाई अर्थमन्त्री जस्तो जनसरोकारको पोर्टफोलियो दिएको भन्दै ओलीइतर खेमाबाटै पनि चर्काे विरोध छ । तर ओलीले भने अहिलेसम्म खतिवडालाई एउटा कार्डका रुपमा प्रयोग गरिरहेका छन् ।

गत फागुनमा नेकपा सचिवालय बैठकले उपाध्यक्ष बामदेव गौतमलाई रिक्त राष्ट्रियसभामा सिफारिश गर्न ओलीलाई निर्देशन दिएको थियो । तर ओलीले सचिवालयको सो निर्णय कार्यान्वयन नगर्ने बताएका थिए । लगत्तै उनले डा. खतिवडालाई फागुन २१ गते अर्थमन्त्रीमा फेरि दोह¥याएका थिए । नेपालको संविधानले मन्त्री बन्न सांसद बन्नैपर्ने व्यवस्था गरेको छ । त्यसैले डा. खतिवडालाई निरन्तरता दिन भदौ २० अगावै राष्ट्रियसभाको रिक्त स्थानमा सिफारिश गर्नुपर्ने अवस्था छ ।

अब बस्ने सचिवालय बैठकले यसबारे ठोस निर्णय लिने बालुवाटार स्रोतले जनाएको छ । तर नेता नेपाल निकट एक केन्द्रीय सदस्यका अनुसार यस सम्बन्धमा सचिवालयले यसअघि नै बामदेवलाई पठाउने निर्णय गरिसकेको छ । त्यसैले ओलीले सो निर्णय कार्यान्वयन गर्नुको विकल्प छैन । तर प्रधानमन्त्री ओलीले हालै एक टेलिभिजन अन्तर्वार्तामा बामदेव गौतमलाई अब प्रतिनिधिसभामा लडाउने निर्णय भएकाले राष्ट्रियसभामा लैजाने भन्ने विषय असान्दर्भिक भइसकेको बताएका छन् । यसबारे बामदेवले भने अहिलेसम्म केही बोलेका छैनन् ।  त्यसैले यो अन्यौल चिर्नका लागि पनि अबको सचिवालय बैठकसम्म कुर्न ओली निकट स्रोतले सुझाएको छ ।

टेक्नोक्र्याट खतिवडा

डा. खतिवडालाई राष्ट्रियसभामा लैजान प्रधानमन्त्री ओलीले नै जोडबल गरेका थिए । हरेक दुई वर्षमा एक तिहाई सदस्यको पदावधि समाप्त हुने एकल संक्रमणीय निर्वाचन प्रणाली अन्तर्गत पहिलो पटक गोला प्रथा गर्दा उनी दुई वर्षमै पदमुक्त हुनेमा परे । ओलीले धेरै नै विश्वास गरेका डा. खतिवडा राजनीतिक रुपमा जनता माझ भिजेका व्यक्ति होइनन् । बिशुद्ध टेक्नोक्र्याट भएकाले उनले राजनीतिक प्रवृत्ति र अवधारणा बमोजिम काम गर्न नसकेको गुनासो नेकपाभित्र व्यापक छ ।उनको स्वभाव पनि सबैसँग घुलमिल गर्न नसक्ने खालको छ । ओलीसँगै निकट कतिपय नेताहरुको कुरा पनि उनी सुन्दैनन् । केवल ओलीप्रति मात्रै उनले वफादारी देखाउने गरेका छन् । प्रचण्ड र माधव नेपालसँगसमेत उनको घनिष्ट सम्बन्ध छैन । त्यसैले उनका हकमा ओली मात्र सकारात्मक भएर पुग्ने अवस्था छैन, भगवान नै दाहिना हुनुपर्ने अवस्था छ ।

ओलीको रुची खतिवडा नै

अर्थमन्त्रीका रुपमा ओलीले अहिलेलाई खतिवडा नै रोज्ने संकेत गरेका छन् । अर्थमन्त्रालयमा राम्रो काम गरेको भन्दा अन्तर्राष्ट्रिय जगतसँग डा. खतिवडाको सम्बन्धका कारण पनि ओलीले उनलाई रुचाएका हुन् । साथै, मन्त्रिमण्डलमा ओलीले विश्वास गर्ने थोरै मध्ये डा. खतिवडा पर्छन् । गोकुल बाँस्कोटाको बहिर्गमनपछि ओलीले आँखा चिम्लेर विश्वास गर्नेमा अर्थमन्त्री खतिवडा परेका छन् । त्यसैले पनि ओली खतिवडालाई साथै लिएर जान चाहन्छन् । यसका लागि ओलीले आगामी सचिवालय बैठकमा उनले नेताहरुलाई मनाउने प्रयास गर्ने भएका छन् ।

कुलमानलाई ल्याउन खतिवडाको प्रस्ताव

नेपाल विद्युत् प्राधिकरणबाट यही भदौ २९ गते पदावधि समाप्त हुन लागेका कुलमान घिसिङलाई पुनर्नियुक्ति गर्न प्रचण्डले ओलीलाई आग्रह गरेका छन् । एक साता अघि नै यस्तो प्रस्ताव लैजान प्रचण्डले उर्जामन्त्री वर्षमान पुनलाई निर्देशन दिएका थिए । तर प्रधानमन्त्री ओलीले अहिले प्रस्ताव नल्याउन भनेपछि रोकिएको छ । ओलीले कुलमानको पुनर्नियुक्तिलाई खतिवडाको विषयमा जोड्न चाहेका छन् । कुलमानको सट्टा डा. खतिवडा भन्ने प्रस्ताव राख्ने पक्षमा छन् ओली । त्यस्तो अवस्था आएमा प्रचण्ड र ओलीबीच दुबैजनालाई निरन्तरता दिने सहमति हुने सम्भावना रहेको स्रोतको भनाई छ ।

बामदेवको चाहना निर्णायक

अर्थमन्त्री डा. खतिवडाको भविष्य बामदेवको चाहनामा निर्भर हुने अवस्था रहेको छ । आगामी सचिवालय बैठकमा बामदेवले आफू राष्ट्रियसभामा जान सहमत भएको बताए भने सबै खेल सकिन्छ – निकट स्रोतको भनाई छ । अहिलेसम्म यसबारे बामदेवले स्पष्ट कुरा राखेका छैनन् । सबै कुरा सचिवालय बैठकमा नै राख्ने मनस्थितिमा उनी रहेको बुझिएको छ ।प्रधानमन्त्री ओलीले भने यसबारे बामदेवसँग कुरा गरेका थिए । तर उनले स्पष्टसँग केही बताएनन् । सचिवालय बैठकमा अरु नेताले जे भन्छन् आफू त्यसैको पक्षमा रहने उनले ओलीलाई बताएका थिए । स्रोतका अनुसार, प्रचण्ड र नेपालले भने बामदेवलाई राष्ट्रियसभामा जान सुझाव दिएका छन् ।